Azis Musaj, 70-vjeçari i cili u qëllua me armë zjarri nga i vëllai në fshatin Çukë e vjetër të Lushnjes, ka humbur jetën në spitalin e Traumës në Tiranës.
Azis Musaj u përfshi në një konflikt me vëllanë e tij Nazif Musaj, 77 vjeç.
Sherri ndodhi rreth orës 8 të mëngjesit dhe sipas bluve, ka pasur si shkak mosmarrëveshjet që kishin palët për çështje pronësie. Konflikti mes vëllezërve degradoi në atë pikë, sa që sipas policisë, Azis Musaj ka goditur me sopatë vëllanë e tij Nazifin, ndërsa ky i fundit e ka qëlluar të parin me armë zjarri.
Të dy u transportuan në spital për të marrë ndihmë mjekësore. Nazif Musaj u plagos me sëpatë në dorë dhe fytyrë, ndërsa vëllai i tij Azisi u plagos me plumb në kokë edhe u transportua në gjendje të rëndë në spitalin e Traumës në Tiranës, ku edhe humbi jetën.
Arma e zjarrit dhe sopata, të përdoruara gjatë konfliktit, janë sekuestruar.
Nazif Musaj ka deklaruar për policinë se vëllai i vogël e ka goditur i pari dhe prandaj ai u detyrua të nxirrte armën dhe ta gjuante. Sipas dëshmisë, ai donte të vriste dhe veten, por e pa që vëllai ishte gjallë dhe nuk e bëri këtë veprim.
“Vëllai më i vogël më goditi disa here duke më vënë poshtë. I gjendur në këto kushte nxora pistoletën dhe e qëllova. Kisha kohë që kisha probleme me të, kisha njoftuar dhe te policin e zonës. Pasi e qëllova me pistoletë doja të vrisja dhe veten, por e pash qe ai nuk vdiq dhe nuk e bëra këtë veprim”, mësohet të jetë shprehur 77-vjeçari./O.S
