Anestezisti i certifikuar Derrick Smith ka treguar së fundmi një nga historitë më të dhimbshme që ka hasur gjatë pandemisë së koronavirusit.
Smith merret me trajimin e pacientëve me Covid-19 në një spital në New York dhe duket se është përballur me shumë histori prekëse, por së fundmi zbuloi fjalët e fundit të një pacienti, teksa ai po e intubonte:
“Kush do të paguajë për këtë?”, -e pyeti pacienti me koronavirus Smithin mes frymëmarrjeve gati të pamundura.
“Ato ishin fjalët e fundit që tha e që nuk do t’i harroj dot kurrë”,-tha Smith për CNN.
“(Ky pacient) ishte në kolaps te frymëmarrjes, kishte vështirësi në të folur dhe prapë shqetësimi i tij kryesor ishte kush mund të paguante për një procedurë që do të zgjaste jetën e tij”- tha ai, duke shtuar se gjasat nuk ishin fare te mira.
Duke ditur që pacienti ka shumë të ngjarë të mos shërohet pasi të jetë intubuar, Smith dhe kolegët e tij thirrën gruan për t’i dhënë mundësinë ta shikonte për herë të fundit.
Pjesa më e madhe e pacientëve me Covid-19 vdesin pasi vendosen në respiratorë, me rreth 80% të rasteve shtoi Smith.
Për anestezistin fjalët e këtij pacienti ishin gjëja më e keqe që kishte dëgjuar gjatë karrierës së tij 12 vjeçare në mjekësi./Fjala.al/
