Ndeshja e djeshme midis Liverpoool dhe Leicester City është mbyllur me rezultatin 4-0. “Reds” shkatërruan kundërshtarët e tyre duke shënuar katër herë portën e mbrojtur nga gardiani Kasper Schmeichel.
Portieri i Leicester u zemërua me vendimin e gjyqtarëve të ndeshjen gjatë pjesës së dytë, kur u dhanë penallti Liverpool-it të trajnerit Jurgen Klopp. Acarimin ndaj një vendimi të tij gardiani e shprehu duke shfryrë ndaj gjyqtarit Michael Oliver dhe ndaj ish-gjyqtarit Dermot Gallacher, i cili tashmë mban rolin e ekspertit.
Në një komunikim me mediet ai ka thënë se Leicester ishte në lojë deri në momentin kur erdhi ky vendim i gjyqtarit.
“Mendoj se ishte pak e vështirë. Ne ishim në lojë derisa gjyqtari duhej ta bënte veten hero, dhe që nga atëherë e humbëm qetësinë. Ata janë skuadra më e mirë në botë së bashku me Manchester Cityn. Ne përpiqemi të jemi si City dhe Liverpool, por ata janë shumë para nesh në udhëtimin e tyre. Cili është emri i tij, Dermot, ai do të jetë në Sky duke thënë ‘oh, është një vendim i shkëlqyeshëm, gjyqtari ishte i guximshëm’ ose diçka e tillë.”-ka deklaruar Schmeichel./Përgatiti: Fjala.al/
