Anëtari i 13-të i grupit që jepnin para me fajde në Shkodër është arrestuar ditën e sotme. Nga policia e Shkodrës mësohet se në pranga ka rënë Jonuz Alija 23 vjeç, i cili ka qenë pjesë e grupit me 16 anëtarë nga të cilët, 13 tashmë ndodhen pas hekurave.
Për 23-vjeçarin është vendosur masa arrest me burg nga Gjykata e Shkodrës, ndërkohë që ndaj tij rëndojnë akuzat për dhënie fajdesh dhe pastrim parash.
Anëtarët e tjerë të arrestuar nga grupi i fajdeve janë: Byrhan Alija, Edi Memcaj, Artan Dragani, Lul Sylja, Pashko Vuksanlekaj dhe ish-drejtori i Patentave në Shkodër, Ilir Sokoli do të qëndrojnë në burg, ndërsa Adri Bala, Marjan Bregu, Vinko Nikprelaj, Eduard Fusha, Elidon Qerimaj dhe Naim Ahmetaj do të hetohen në masën e sigurisë detyrim paraqitje.
Rikujtojmë se në datën 14 mars, Policia dhe Prokuroria zbuluan një skemë fajdesh në Shkodër me 23% interes në javë dhe nëse nuk ktheheshin lekët, grupi u merrte njerëzve prona dhe makina dhe i kalonin në emër të tyre. Në këtë grup kriminal rezultuan të përfshirë ish-kancelarë gjykate, noterë, policë dhe një ish-drejtues i Patentave në Shkodër. Ndërsa Ilir Sokoli u kap në tentativë për t’u arratisur, në Morinë.
Në fillim u arrestuan 12 persona, ndërsa së fundmi u bë e mundur edhe arrestimi i Jonuz Alijas, duke bërë që tashmë të jenë në kërkim vetëm 3 persona të tjerë, ndërsa 3 janë pezulluar nga detyra.
Nga ky operacion u sekuestruan makina, prona, armë dhe rreth 500 mijë euro, ndërkohë që u pezullua një polic, noterja dhe një drejtor në Bashkinë e Shkodrës.
Rikujtojmë se ish-prefekti i Shkodrës, Paulin Radovani denoncoi grupin dhe tha se autorët kishin dhënë para me fajde ndaj dy djemve te tij dhe disa të tjerë kane luajtur rolin e garantit duke marra para për llogari të dy djemve të Radovani./Fjala.al/
