Zhuljen Varfaj, kryebashkiak i komanduar i Durrësit, ka dhënë dorëheqjen. Pas dorëheqjes së Valbano Sakos nga detyra, në muajin dhjetor, për shkak të një gafe gjatë emergjencës së tërmetit, Varfaj u emërua kryebashkiak i ri, por pas 4 muajsh ka vendosur edhe ai që të largohet.
Zhuljen Varfaj është larguar për arsye shëndetësore. Kur mori detyrën në dhjetor të 2019-ës, ai vijonte të ishte me raport mjekësor.
Në fakt, dorëheqja e Varfaj pritej që në muajn mars, por bashkia e Durrësit i mohoi raportimet. Ai njihet si njeri i afërt me ish-kryebashkiakun Vangjush Dako.
Çfarë u raportua 1 muaj më parë për dorëheqjen e Zhuljen Varfajt?
Teksa pritej dorëheqja për shkaqe shëndetësore, raportohej se Zhuljen Varfaj do të rikthehej në postin e nënkryetarit të bashkisë. Informacionet ishin se në krye të bashkisë do të emërohej Emiriana Sako. Ajo u zgjodh në nënkryetare në fund të muajit shkurt dhe duket se ky ishte hapi i parë në emërimin në krye të bashkisë.
Emiriana Sako është me profesion arkitekte dhe prej rreth 11 vitesh është pjesë e stafit të bashkisë. Në periudhën 2009-2015, ajo ka punuar si specialiste në Drejtorinë e Planifikimit dhe Zhvillimit të Territorit. Nga viti 2015-2018 ka mbajtur postin e Drejtorit të Shërbimeve Publike, ndërsa nga 2018 e deri në shkurt 2020 ka qenë Drejtoreshë e Përgjithshme e Shërbimeve dhe Punëve Publike në bashki.
Raportohet se ajo ka dhënë kontribut në ndërtimin e projekteve të rëndësishme në qytet si sheshi “Liria”, Sfinksi, Veliera etj, kjo e fundit shumë e kundërshtuar nga opozita dhe shoqëria civile si një projekt që shkatërron një pjesë të gjetjeve arkeologjike në Durrës.
Tani që dorëheqja e Zhuljen Varfajt u zyrtarizua, pritet të shihet nëse Emiriana Sako është e përzgjedhura e radhës e Partisë Socialiste.
Pas dorëheqjes së Sakos, Durrësi ashtu si edhe Shkodra, është në pritje të zgjedhjeve të parakohshme lokale, datë që nuk po firmoset nga Presidenti i Republikës, pasi nuk i njeh kryebashkiakët e dalë nga zgjedhjet e 30 qershorit 2019.
Vijon…
