Kryeministri Edi Rama ka refuzuar propozimin e bërë nga ish-ministri i Shëndetësisë, Ilir Beqaj, për të ulur pensionet dhe rrogat si masë për të përballuar krizën ekonomike që po shkakton pandemia e koronavirusit.
Duke e konsideruar thjesht si një ide të ardhur nga ata “që nuk kanë të lidhur prizën e gjuhës me trurin”, Rama përsëriti disa herë gjatë komunikimit në ‘Facebook’ se nuk do të ketë ulje pensionesh dhe rrogash.
“Kurrë asnjëherë nuk ka patur dhe nuk do të ketë prekje të pensioneve apo pagave. Përkundrazi, nëse do të preken, do të preken vetëm për t’u rritur, jo për t’u ulur. Shkurt, cop”, u shpreh kryeministri.
Propozimi i deputetit të Partisë Socialiste shkaktoi zemërim te të moshuarit shqiptarë, të cilët kanë pensionin më të ulët në Evropë. Shqipëria është gjithashtu shteti që ka pagat më të ulta në continent dhe propozimi i Beqajt u kundërshtua ashpër nga ekonomistët vendas.
