Shkrimtarja Mimoza Ahmeti ka rrëfyer historinë e keqkuptimit që kishte krijuar Nexhmije Hoxha për një poezi të sajën.
Në ciklin “Poetët për poetët” iniciuar nga Qendra Kombëtare e Librit dhe Leximit, Ahmeti tregon se si gruaja e diktatorit mendoi se vargjet që autorja kishte shkruar për të dashurin e saj, i referoheshin vetë Nexhmijes.
“Ne patëm një takim simbolik: kisha shkruar një poezi për të dashurin tim, ku e quaja “hiena me sy të kaltereme”. Kisha shtuar: Prova e qëndresës sime! Gruaja “Diktatore” kishte kujtuar se këto vargje aludonin për të”, kujton shkrimtarja.
Duke hedhur dyshimin se Nexhmije Hoxha mund të ketë ndërruar jetë nga koronavirusi, Mimoza Ahmeti thekson se edhe kritikë të letërsisë pas viteve ’90, vijonin të mendonin se poezia e saj ishte censuruar pasi vargjet i referoheshin gruas të diktatorit.
Reagimi
Unë isha një poete e re, që ajo nuk e takoi asnjëherë.
Ajo ishte një grua, “Diktatorja”, që unë nuk e takova asnjëherë.
Ne patëm një takim simbolik: kisha shkruar një poezi për të dashurin tim, ku e quaja “hiena me sy të kaltereme”.
Kisha shtuar: Prova e qëndresës sime! Gruaja “Diktatore” kishte kujtuar se këto vargje aludonin për të.
Kur “Diktatoren” e rrëzuan nga pushteti, kritiku më në zë i letrave dhe esteti, më thoshte që donte të shkruante një libër për mua.
Se si diktatura më kishte censuruar dhe përndjekur. Unë nuk mund t’i shpjegoja atij se ajo poezi e mallkuar, që e kishte bërë atë grua të tërbohej, i kushtohej të dashurit tim.
Kritiku estet më ndiqte. Vazhdoja t’i ikja, derisa ndërroi jetë. Po këtë vit, ndoshta nga Corona, ndërroi jetë edhe “Diktatorja”.
Tani që ata të dy nuk janë, unë pa frikë mund të pohoj se diktati vjen nga keqkuptimi dhe se frika nga tjetri krijon fantazmën historike.
