Ekosistemi Facebook, që përveç rrjeteve sociale përfshin edhe Instagramin, Messengerin dhe WhatsApp, i ka tejkaluar 3 miliardë përdorues mujorë dhe cdo ditë 2.3 miliardë persona përdorin së paku një nga këto platforma.
Lajmin e bëri publik vetë Marc Zuckerberg teksa publikoi shifrat e tremujorit të parë të vitit 2020. Ndërkohë përdoruesit vetëm të Facebook kanë arritur në 2.6 miliard në mbarë botën.
Zuckerberg është ndër të paktët persona në glob, i kënaqur nga periudha e pandemisë dhe vetizolimit në shtëpi për shkak të rritjes së përdorimit të aplikacioneve të drejtuara prej tij.
Në vendet më të goditura nga Covid-19, volumi i mesazheve të dërguara është rritur me mbi 50% ndërsa shifrat për mesazhet vokale apo video janë dyfishuar, për aplikacionet Messenger dhe WhatsApp.
Në Itali për shembull, koha e kaluar në këto apikacioni është rritur me mbi 70%. Dyfishim kanë shënuar edhe transmetimet direkte përmes Instagram dhe Facebook. Në frontin e luftës kundër lajmeve të rreme në epokën e koronavirusit, Facebook ndërmori fushatën për t’i zhdukur ato nga rrjeti dhe kështu ka bërë me më shumë se 4 mijë postime e lajme të rrezikshme për virusin që u etiketuan si “false”./Fjala.al/
