Presidenti Hashim Thaçi ka reaguar pas vendimit të Gjykatës Kushtetuese për të pezulluar dekretin e tij ku i jepej Avdullah Hotit mandati i kryeministrit. Thaçi thekson se do e respektojë vendimin e Gjykatës dhe se këtë sjellje kërkon edhe nga aktorët e tjerë politikë.
“Sapo u njoftova për vendimin e Gjykatës Kushtetuese të Republikës së Kosovës. Si President i Republikës së Kosovës do ta respektoj në plotëni këtë vendim. Kosova ka tashmë një përvojë të çmueshme në respektimin e të gjitha vendimeve dhe aktgjykimeve të Gjykatës Kushtetuese. Kjo përvojë është një dëshmi e fuqishme e sundimit të ligjit në Republikën e Kosovës.
Si President i Republikës së Kosovës i ftoj të gjithë politikanët dhe subjektet politike në vend, që të sillen me maturi në respektim të Kushtetutës së Republikës së Kosovës”, shprehet Thaçi.
Për vendimin ka reaguar edhe kryeministri në detyrë, Albin Kurti, i cili kërkon nga mbështetësit e tij që të mos entuziasmohen pasi vendimi nuk është ende përfundimtar.
“Qeveria konsideron që vendosja e masës së përkohshme është në interesin publik dhe gjithashtu i shërben administrimit të drejtësisë. Megjithatë është e nevojshme të kujtojmë që ky pezullim nuk e prejudikon vendimin përfundimtar të Gjykatës. Kështu që është tejet e rëndësishme që të mos entuziazmohemi, të rrimë të fokusuar në drejtim të qëllimit tonë për menaxhimin sa më të mirë të situatës me pandeminë COVID-19”, shprehet Kurti.
Gjykata Kushtetuese vendosi sot të pezullojë deri më 29 maj dekretin e Thaçit, kur pritet të dalë me një vendim përfundimtar.
Dekreti i Thaçit u ankimua në Gjykatë nga Lëvizja Vetëvendosje, qeveria e së cilës u rrëzua pas mocionit të mosbesimit nga ish-aleati në koalicion, Lidhja Demokratike.
Vetëvendosje kërkon që vendi të shkojë në zgjedhje të parakohshme pasi qeveria e dalë nga zgjedhjet e 6 tetorit u rrëzua. Por presidenti Thaçi dhe partitë opozitare theksojnë se deputetët kanë të drejtë të votojnë për një qeveri të re.
LDK-AAK-AKR dhe NISMA kanë formuar një koalicion të përbashkët me Avdullah Hotin si kandidat për kryeministër, ndërkohë që kanë realizuar edhe ndarjen e ministrive. Por Qeveria e re nuk do të votohet në Kuvend pa u shprehur Gjykata Kushtetuese.
