Kur filloni të keni hundë që ju rrjedhin dhe dhimbje fyti, është e qartë që po sëmureni – por sfida është të kuptoni se për çfarë bëhet fjalë. Në mes të sezonit të gripit dhe të ftohtit, një kollë e vetme mund t’ju çojë në një kërkim të gjatë në internet për të gjetur ndryshimet mes gripit, të ftohtit të zakonshëm dhe COVID-19. Por, ka disa mënyra kyçe për t’i dalluar këto tri sëmundje nga njëra-tjetra.
“Simptomat e gripit dhe COVID-it kanë shumë të përbashkëta,” thotë Sandra Kesh, mjeke për infeksionet. “Të dyja shkaktojnë ethe, kollë, vështirësi në frymëmarrje, lodhje dhe shumë simptoma të tjera.” Për të dalluar nëse bëhet fjalë për të ftohtë, grip apo COVID, duhet të dini ndryshimet në mënyrën se si shfaqen dhe zgjasin simptomat.
Dallimi mes simptomave të gripit dhe COVID-19
Dallimi kryesor mes gripit dhe COVID-19 qëndron te shpejtësia e shfaqjes dhe kohëzgjatja e simptomave. Gripi zakonisht shfaqet brenda një deri në katër ditë pas ekspozimit, ndërsa simptomat e COVID-it mund të shfaqen nga dy deri në 14 ditë pas infektimit.
Kohëzgjatja e simptomave ndryshon gjithashtu: simptomat e gripit zgjasin nga disa ditë deri në dy javë, ndërsa simptomat e COVID-it mund të zgjasin deri në gjashtë javë në rastet më të rënda.
Dallimi mes simptomave të të ftohtit dhe COVID-19
Ftohja e zakonshme është shumë më e lehtë në krahasim me gripin dhe COVID-in, si nga ashpërsia ashtu edhe nga kohëzgjatja e simptomave. Simptomat e të ftohtit shfaqen gradualisht dhe zakonisht arrijnë kulmin pas dy ose tre ditësh nga ekspozimi. Në përgjithësi, simptomat e të ftohtit zgjasin rreth shtatë ditë, ndërsa ato të gripit dhe COVID-it mund të zgjasin deri në dy javë.
Tabela e simptomave kryesore për të dalluar COVID-in, gripin dhe të ftohtin
Kur duhet të vizitoni një mjek?
Nëse keni simptoma gripi ose COVID-i dhe mendoni se mund të jeni infektuar, bëni një test COVID-i në shtëpi ose kontaktoni mjekun tuaj për një diagnozë. Nëse jeni i/e moshuar, shtatzënë, keni një gjendje shëndetësore kronike ose po kujdeseni për një fëmijë të vogël me simptoma të ngjashme me gripin apo COVID-in, kërkoni ndihmë mjekësore menjëherë./K.K
