Pasi ka kaluar mbi 1 orë e 30 minuta nga atentati që u bë ndaj kryebashkiakut të Lushnjës, Fatos Tushe, ka ardhur edhe reagimi i parë i Policisë së Shtetit.
Në njoftimin e bërë publik për mediat, policia konfirmon se në zyrën e Tushes është hedhur një granatë dore nga Gëzim Saraçi, i cili deri para pak kohe mbante detyrën e shoferit të kryebashkiakut të Lushnjës.
Njoftimi i plotë i Policisë së Shtetit
Sot, rreth orës 09:00, në zyrën e Kryetarit të Bashkisë Lushnjë, dyshohet se është hedhur një granatë dore dhe për pasojë është dëmtuar Kryetari i Bashkisë shtetasi Fatos Tushe dhe sekretarja e Bashkisë, shtetasja E. Q., të cilët ndodhen në spitalin e Lushnjës, nën kujdesin e mjekëve
Nga veprimet e para hetimore dyshohet se autor i kësaj ngjarjeje është ish-shoferi i Kryetarit të Bashkisë, shtetasi G. S., i cili pasi ka hedhur granatën është larguar menjëherë nga ambientet e Bashkisë Lushnjë.
Forca të shumta policie të Komisariatit të Policisë Lushnjë, të DVP Fier, Renea e FNSH e Fierit po krehin zonën, me qëllim kapjen dhe arrestimin e autorit.
Grupi i posaçëm hetimor, me Specialistë nga Departamenti i Policise Kriminale ne Policine e Shtetit dhe DVP Fier, nën drejtimin e Prokurorisë po punon për zbardhjen e plotë të ngjarjes.
