Liderët politikë të Irlandës kanë deklaruar se Conor McGregor nuk përfaqëson vendin, pas vizitës së tij në Shtëpinë e Bardhë për një takim me presidentin amerikan Donald Trump me rastin e Ditës së Shën Patrikut.
McGregor, i shoqëruar nga partnerja dhe katër fëmijët e tij, vlerësoi etikën e punës së Trump si “frymëzuese” dhe premtoi të ngrinte çështjet e emigracionit në Irlandë. Trump e vlerësoi McGregor si një “punëtor fantastik”.
Javën e kaluar, gjatë një takimi me kryeministrin irlandez Micheál Martin, presidenti amerikan lavdëroi tatuazhet e McGregor. Luftëtari i MMA mori gjithashtu pjesë në inaugurimin e Trump në janar.
Megjithatë, McGregor është një figurë kontroverse. Në vitin 2024, një grua që e akuzoi për dhunë seksuale fitoi një proces gjyqësor kundër tij, duke e detyruar atë të paguajë mbi 248 000 euro dëmshpërblim.
Gjatë konferencës së shtypit në Shtëpinë e Bardhë, McGregor akuzoi qeverinë irlandeze se kishte “braktisur” zërave të popullit dhe kritikoi politikat e emigracionit. Ai deklaroi se “paratë tona po shpenzohen për çështje të huaja që nuk kanë lidhje me popullin irlandez”.
Deklaratat e tij hasën kundërshtime nga liderët irlandezë. Kryeministri Martin e kritikoi McGregor duke thënë se “fjalët e tij nuk pasqyrojnë frymën e Ditës së Shën Patrikut apo vlerat e popullit irlandez”. Edhe zv.kryeministri Simon Harris u distancua nga deklaratat e tij, duke theksuar se McGregor nuk flet në emër të Irlandës dhe nuk ka mandat për këtë.
Deputeti Matthew O’Toole nga Partia Socialdemokrate dhe Laburiste (SDLP) e quajti paraqitjen e McGregor në Shtëpinë e Bardhë “një fyerje për Irlandën” dhe “depresionuese”.
Gjatë vizitës së tij, McGregor u fotografua gjithashtu me Elon Musk, i cili është një nga mbështetësit kryesorë të Trump dhe po udhëheq përpjekjet për të reduktuar madhësinë e qeverisë federale amerikane./E.T
