Policia britanike ka zbuluar një rrjet të jashtëzakonshëm krimi ndërkombëtar të udhëhequr nga shqiptarë. Në një artikull të publikuar në “Daily mail” tregohet sesi mafiozët shqiptarë nxisin furnizimin me drogë të paligjshme me vlerë miliona paund në Britaninë e madhe. Hetimi ndaj tyre nisi disa muaj pasi banorët vendas panë një grup punëtorësh me furgona të ndezur dhe të veshur me xhaketa pune në Wellesley Road në Middlesbrough, teksa gërmonin në linjat elektrike përgjatë rrugës. Pavarësisht pamjes së tyre profesionale, banorët u trembën nga një seri shpërthimesh të vogla. Ajo që i bëri të dyshonin ishte fakti se ndërsa shpërtheu zjarri, punëtorët futën me nxitim pajisjet e tyre në pjesën e pasme të furgonit të tyre dhe u larguan me shpejtësi, duke lënë flakët të përpinin trotuarin dhe duke shkaktuar dëme në rrjetin elektrik.
Edhe pse për vite me radhë, ky episod i çuditshëm dukej si një anekdotë kurioze për vendasit, së shpejti u bë qendër e një hetimi të paprecedentë policor ndaj një rrjeti të jashtëzakonshëm krimi ndërkombëtar të udhëhequr nga kriminelë shqiptarë.
Në fillim të këtij muaji policia arriti në përfundimin se këto skuadra punëtorësh në dukje të ndershëm, ishin në fakt kriminelë të ashpër që nxisnin furnizimin me drogë të paligjshme me vlerë miliona paund.
Nën maskën e një kompanie legjitime, misioni i tyre ishte të hapnin trotuare dhe të rilidhnin furnizimet me energji elektrike në fermat e kanabisit të drejtuara nga zotërinjtë e tyre shqiptarë.
Hetimi, që ka zgjatur katër vjet, ka zbuluar se ata ishin të angazhuar në një operacion që përfshinte rreth 32 zona të forcave të policisë dhe 100 fermat e kanabisit, duke shfrytëzuar energjinë elektrike të vjedhur për të fuqizuar prodhimin e drogës me vlerë deri në 21 milionë paund. Kriminelët shqiptarë, që mbajnë një kontroll të hekurt mbi tregtinë e drogës në Britani, përdornin teknikën e “hidroponikës” për rritjen e bimëve në ambiente të mbyllura, duke përdorur shpesh punëtorë të trafikuar për të punuar nën kushte të tmerrshme në këto ferma droge.
Në vitin 2023, pas një hetimi të gjerë dhe bastisjesh të koordinuara, 8 burra u arrestuan dhe u dënuan për rolin e tyre në këtë rrjet të krimit të organizuar. Hetimet kanë nxjerrë në pah detaje të tmerrshme për mënyrën se si kjo bandë përdorte punëtorë të legjitimuar dhe paguante elektricistë të importuar për të ndihmuar në lidhjen ilegale të energjisë, një teknikë që i ndihmonte mafiozët të shmangnin zbulimin nga autoritetet.
Sipas medias britanike nga 12,685 shqiptarët që arritën në Mbretërinë e Bashkuar me varka të vogla në vitin 2022, shumë prej tyre ishin të aftë në teknologjinë ‘hidroponike’ të nevojshme për rritjen e bimëve në ambiente të mbyllura.
Një pjesë e madhe e këtij operacioni ka mbetur e paidentifikuar, pasi udhëheqësit kryesorë të këtij rrjeti shqiptar, të cilët menaxhonin aktivitetin e paligjshëm nga larg, kryesisht nga Dubai, ende janë të lirë.
Hetimet janë ende në zhvillim, ndërsa autoritetet po përpiqen të zbulojnë më shumë detaje rreth lidhjeve të krimit të organizuar shqiptar dhe mënyrës se si ata kanë arritur të kontrollojnë këtë treg të rrezikshëm në Mbretërinë e Bashkuar.
Ky operacion ka hedhur dritë mbi depërtimin e thellë të aktivitetit të krimit të organizuar shqiptar në Britani dhe ka nënvizuar rrezikun e vazhdueshëm të këtyre bandave që operojnë nën maskën e kompanive legjitime./e.t
