Ish-zv.ministri i Shëndetësisë, Bardh Spahia ka bërë me dije se bashkia e Shkodrës ka realizuar një studim ku rezulton se vdekjet janë rritur me 40% krahasuar me një vit më parë. Duke hedhur dyshime se kjo rritje mund të ketë ardhur si pasojë e koronavirusit, Spahia tha në emisionin “Real Story” në News 24 se për këtë studim nevojitet një hetim më i plotë.
“Është një studim i Bashkisë Shkodër, e cila thotë se ka një rritje me 40% e numrit të të vdekurve…Ky studim do edhe një miratim, vullnet për ta realizuar. Ky fakt i bashkisë kërkon hulumtim të thellë, pasi mund të tregojë edhe situatën reale, pra mund të jenë vdekje të shtuara si pasojë e COVID 19. Problemi më i madh në këtë situatë është mungesa e testimeve”,- tha ai.
Ai vijoi duke thënë: “Me politikat e testimeve nuk habitem që gjithë Shqipëria të dalë zonë e gjelbër. Unë po them nuk mund ta zgjasim pafund izolimin. Pas valës kryesore u zgjat jashtë cdo limiti, s’kemi argument dhe studime që na tregojnë përhapjen e virusit. Po them që nuk mund të shkatërrojmë ekonominë e shqiptarëve se nuk po durojmë dot më. Ky është realiteti, kështu na kanë lënë”,- shtoi ai.
Ish-deputeti i Partisë Demokratike akuzoi Qeverinë e drejtuar nga Edi Rama se ka fshehur numrin real të vdekjeve nga COVID-19 dhe, sipas tij, në Shkodër janë të paktën 5 raste për të cilat ka informacion, që vdekjet janë shkaktuar nga koronavirusi, por ngaqë kishin patologji të tjera nuk janë kalkuluar.
