“Serbia është duke kryer spastrim të heshtur etnik ndaj shqiptarëve në Medvegjë, Preshevë dhe Bujanoc” shkruan kryetarja e Kuvendit të Kosovës, Vjosa Osmani.
Në komentin e saj Osmani tha se autoritetet serbe, në katër vjetët e fundit, kanë pasivizuar adresat nga regjistri civil të mbi 4,000 shqiptarëve të Medvegjës.
Ky veprim, sipas saj, është vërejtur edhe në dy komunat e tjera me popullsi shqiptare, Bujanoc dhe Preshevë.
“Përmes ‘pasivizimit të adresave’ të vendbanimit, shteti serb bën largimin përfundimtar të shqiptarëve nga regjistri civil i Serbisë, duke ua pamundësuar marrjen e dokumenteve të reja, të drejtën e qasjes në shërbime mjekësore ose asistencë sociale, e madje edhe i largon nga lista e votuesve, që u pamundëson pjesëmarrjen në zgjedhje”, tha Osmani.
Çështja e pasivizimit të adresave të banimit të shqiptarëve në Luginën e Preshevës ishte diskutuar në një seancë të jashtëzakonshme të Kuvendit të Kosovës në muajin korrik të vitit të kaluar.
Ajo kërkoi nga institucionet e Kosovës që të mos heshtin në raport me këto veprime të shtetit serb, derisa tha se një shtet si Serbia, që, sipas saj, “aktivisht angazhohet në spastrim etnik”, nuk e meriton anëtarësimin në Bashkimin Evropian./l.m/Fjala
