Vazhdon të tërheqë gjithnjë e më tepër vëmendje, çështja e blerjes së një klubi elitar në futbollin anglez si Newcastle United. Skuadra e Premier League është pranë finalizimit të një akordi multimilioner që do çojë skuadrën në duart e princit saudit të kurorës, lëvizje që ka ngjallur polemika.
E fejuara dhe familja e gazetarit arab të vrarë, Jamal Khashoggi, i ka dërguar një letër të hapur pronarit aktual Mike Ashley, dhe tifozëve, të revoltohen për të mos e shitur skuadrën e zemrës në një person që ka duart me gjak. Klubi i Premier League ka arritur marrëveshjen me 300 milionë Paund nga një konsorcium misterioz, Saudi Public Investment Fund, që thuhet se përdoret si “makiazh” nga princi Bin Salman. Edhe Amnesty International ka kërkuar pezullimin e shitjes së klubit të futbollit, por efekt më të madh po jep letra e Hatice Cengiz.
“Në një kohë vendimtare për ekipin tuaj, sundimtari fuqiplotë i Arabisë Saudite, Princi Mohammed bin Salman synon ta blejë ekipin me shumë para. E di që shumë prej jush po tundohen por ky Princ akuzohet për vrasjen e Jamal. Të gjitha hetimet e besueshme e tregojnë këtë. Ai nuk po shkon në gjyq pasi kontrollon vendin me grusht të hekurt. Mos lejoni shitjen e Newcastle” tha Hatice Cengiz.
Gazetari disident u vra në konsullatën arabe në Stamboll, madje thuhet se trupi i tij u copëtua dhe u shkri në substanca kimike para dy vjetësh, për të fshehur krimin.
