Futbolli evropian po synon dalëngadalë rikthimin, duke nisur të përcaktojë edhe datat e nisjes dhe mbylljes së pjesës së mbetur të sezonit. Por jo i gjithë fronti evropian qëndron i pathyer, teksa dy kampionate madhore, siç është ai francez dhe ai holandez, e kanë ulur siparin, duke e mbyllur konkretisht sezonin. Premier Liga angleze mund të rikthehet pa tifozë më 1 qershor, ndërsa planet për t’i luajtur ndeshjet në fusha asnjëanëse nuk u pranuan nga klubet. Stërvitja mund të rinisë në grupe të vogla më 18 maj, ndonëse ende mbeten shumë pikëpyetje.
Ndonëse Skocia ka votuar në prill që nivelet e ulëta të futbollit të mos e vazhdojnë më sezonin, duke përcaktuar edhe fitueset e çdo kategorie, si dhe skuadrat që ngjiten apo zbresin nga kategoria, ka mbetur pezull fati i Premier Ligës së saj dhe ende nuk ka një datë për rifillimin, që, sikundër në gjithë kontinentin, do të jetë pa tifozë.
Në Itali, klubet e Serisë A kanë votuar për ta rinisur sezonin më 13 qershor, por vendimi përfundimtar i përket qeverisë italiane. Ky vendim, i marrë me shumicë votash, vjen pasi Ministri Italian i Sporteve, Vinçenco Spadafora, tha se është rënë dakord nga Qeveria dhe Federata Italiane e Futbollit për një protokoll mjekësor dhe skuadrat do të rifillojnë stërvitjet më 18 maj.
Në Spanjë, presidenti i La Ligës, Havier Tebas, shpreson që futbolli të rikthehet aty më 12 qershor, madje duke luajtur ndeshje çdo ditë me shpresën për ta mbyllur sezonin. Klubet në dy nivelet më të larta të kampionatit spanjoll kanë nisur testimet e lojtarëve për virusin korona javën e shkuar dhe shumica e ekipeve kanë rinisur stërvitjet, hëpërhë individuale, që është faza e dytë, nga 4 të tilla, e protokollit të rikthimit.
Në Francë, sezoni i Ligës 1 u mbyll dhe nuk do të vazhdojë, ndërsa Paris SG-ja ka fituar titullin e 7-të kampion në këto 8 vitet e fundit. Skuadra pariziene kishte një epërsi prej 12 pikë ndaj ndjekëses më të afërt, Olimpikut të Marsejës kur u pezulluar kampionati. Ky vendim erdhi pasi kryeministri i vendit, Eduard Filip bëri të ditur se asnjë ngjarje sportive, edhe ato në salla të mbyllura, nuk do të lejohet deri në shtator.
Në Gjermani, Bundesliga do ta rinisë sezonin më 16 maj, pasi qeveria hapi dritën jeshile për rikthimin. Edhe niveli i dytë i Bundesligës gjermane mund të rinisë në gjysmën e dytë të majit, natyrisht, pa tifozë, ndërsa është Liga Gjermane e Futbollit (DFL), ajo që do të vendosë për datën e saktë. Bundesliga e parë pritet të mbyllet më 23 qershor 2020, ndërsa ajo e dyta një ditë më pas.
Edhe Holanda i është bashkuar Francës, duke e mbyllur në mënyrë arbitrare kampionatin, duke mos shpallur kampione në asnjë kategori dhe duke mos lejuar as ngjitjen e as zbritjen nga kategoria, çka ka çuar në reagime të ashpra të komunitetit të futbollit në vend. Është të paktën dy klube, një në nivelin më të lartë dhe një në nivelin e dytë, që kanë kërcënuar ta çojnë çështjen në gjyq.
Ndonëse fillimisht u duk se u dorëzua e para, Belgjika bërë “prapa-kthehu” dhe të hënën skuadrat do të rinisin stërvitjen, por me kufizime të shumta. Ndonëse qeveria belge i ka ndaluar veprimtaritë sportive deri më 31 korrik, mbetet ende për t’u parë nëse do të ketë një datë për kthimin e futbollit në vend, ndërsa në krahun tjetër mbetet në fuqi një kërcënim i UEFA-s sa u përket kampionateve që ndërpriten pa arsye.
Në Portugali, qeveria ka deklaruar se niveli më i lartë i kampionatit vendas të futbollit mund të rifillojë më 30 maj, kurse niveli i dytë e ka mbyllur sezonin, duke përcaktuar edhe dy skuadrat që do të ngjiten në Primera Liga, por edhe dy skuadrat që do të zbresin një shkallë më poshtë.
Në Danimarkë, Superliga e futbollit do të rifillojë më 28 maj, pas mëse dy muajsh ndërprerje, ka bërë të ditur të hënën federata vendase e futbollit. Po të hënën, skuadrat kanë mundur t’u rikthehen stërvitjeve dhe, gradualisht, edhe ndeshjeve, që do të luhen pa tifozë. Sezoni do mbyllet më 29 korrik 2020. Edhe Federata Turke e Futbollit ka bërë të ditur se Superliga do të rinisë më 12 qershor./Fjala.al/
