Ne të gjithë jemi të vetëdijshëm për dhimbjen psikologjike të një zemre të thyer – libra, këngë dhe filma të panumërt janë shkruar dhe realizuar mbi këtë temë – por ka edhe prova shkencore që një zemër e thyer mund të jetë gjithashtu fatale.
Termi mjekësor është kardiomiopatia takotsubo (TC), një dobësim i zemrës i shkaktuar nga stresi fizik ose emocional. Një studim i ri nga studiuesit në Universitetin e Arizonës shqyrtoi të dhënat e 199,890 pacientëve në SHBA midis viteve 2016 dhe 2020.
Edhe pse gjendja ishte më e zakonshme te gratë, vdekjet ishin më shumë se dy herë më të mundshme tek burrat.
Studiuesit kanë paraqitur një hipotezë për hendekun midis burrave dhe grave. Besohet se TC shkaktohet nga një rritje e hormoneve të stresit, e shkaktuar nga stresi fizik ose emocional – kështu që një stres fizik mund të jetë një ndërhyrje kirurgjikale ose një infeksion, ndërsa stresi emocional mund të jetë një divorc ose vdekja e një të dashuri. Stresi fizik është më i zakonshëm tek burrat, gjë që mund të shpjegojë numrin më të lartë të vdekjeve të shkaktuara nga kjo gjendje. Studiuesit gjithashtu mendojnë se ndryshimet në ekuilibrin hormonal midis gjinive mund të luajnë një rol.
Sindroma e zemrës së thyer lidhet me mosfuksionimin e muskujve të zemrës pas një ndodhie stresuese, traumatike. Gjithçka nis me dhimbje të forta dhe të papritura në kraharor kur shtimi i hormoneve të stresit ndërhyn në pompimin e gjakut në një pjesë të zemrës.
Hormonet e stresit shtohen gjatë ndodhive traumatike si vdekja e një njeriu të dashur, një ndarje, lëndime fizike, apo edhe gjatë ndodhive pozitive si fitimi i lotarisë apo një festë surprizë. Individët me sindromën e zemrës së thyer fillojnë të vënë re simptomat pak minuta deri në pak orë pas ndodhisë stresuese.
Shpeshherë, sindroma e zemrës së thyer keqdiagnostikohet si atak kardiak, ngaqë simptomat janë të ngjashme.
Përveç dhimbjes në kraharor dhe problemeve me frymëmarrjen, pacientët me sindromën e zemrës së thyer përjetojnë edhe ndryshime në ritmin e zemrës të përngjashme me ato të atakut kardiak. Por, kur iu nënshtrohen një analize që përcakton cilat janë arteriet e bllokuara në rastin e një ataku kardiak, nuk iu gjendet asnjë enë gjaku e bllokuar. Përkundrazi, atyre s’u punon si duhet një pjesë e konsiderueshme e zemrës.
Shumica e njerëzve shërohen vetiu brenda pak javësh, por nëse keni probleme me zemrën, tension të ulët gjaku, anormalitete me ritmin e zemrës, bëni mirë të flisni me mjekun./E.Ç
