Gjykata e Shkodrës ka dënuar me 6 vite burg Erdgys Arrazin, burrin e arrestuar një vit më parë për tragjedinë në ujërat e lumit Buna, ku Alma Arrazi u vetëflijua bashkë me tre fëmijët e mitur. Për shkak të dhunës fizike dhe psikologjiek, gruaja e Arrazit shkoi drejt vetëflijimit.
Gjyqtari Orgent Nazaj ka deklaruar fajtor dhe dënuar me 6 vite burgim Erdgysin, për akuzën e “Shkaktimit të vetëvrasjes”, por për shkak të gjykimit të shkurtuar, ky dënim është ulur me 2 vite, duke e dënuar përfundimisht me 4 vite.
Togat e zeza kanë konstatuar se i pandehuri, ka ushtruar dhunë fizike dhe psikologjike ndaj gruas së tij, duke shkaktuar tek kjo e fundit një gjendje ankthi dhe depresioni, që çoi në vetëflijim në ujërat e Lumit Buna.
E gjithë ka nisur për shkak se Erdgys Arrazi kishte krijuar një lidhje jashtë martesore, dhe presionin bashkëshortes ia bënte me qëllim që ajo të largohej nga banesa e tyre në Shkodër. Sakaq, gjyqtari Orgent Nazaj ka vendosur të pranojë kërkesën e Prokurorisë së Shkodrës për pushimin e akuzës për “Vrasje në rrethana cilësuese” ndaj Erdgys Arrazit, me argumentin se nuk u konstatuan prova bindëse për faktimin e kësaj vepre penale.
39 vjeçarja Alma Arrazi u vetëmbyt në lumin Buna më 2 maj 2024 rreth orës 20:00 pasi u nda nga kunata e saj me të cilën pinë kafe. Por ngjarja u bë publike tre ditë më pas, pasi Alma kishte thënë se do shkonte tek vëllai i saj në Durrës dhe sipas familjarëve, ajo e bënte shpesh këtë prandaj dhe nuk dyshoi askush prej ditës së parë.
Ngjarja tronditi opinion publik dhe autoritetet nisën një operacion të gjerë kërkim-shpëtimi, ku fillimisht u gjet trupi i pajetë i një prej vajzave të mitura në anë të lumit Buna nga një peshkatar, pas 24 orësh u gjet edhe motra tjetër, ndërsa trupi i pajetë i Alamës me djalin e vogël u gjetën pas 3 ditësh kërkime intensive nga polumbarët e RENEA dhe FNSH dhe Forcat e Armatosura.
Alma Arrazi dyshohet se u vetëmbyt në ujërat e lumit Buna bashkë me fëmijët për shkak të tradhëtisë së bërë nga bashkëshorti i saj, Ergys Arrazi si dhe nga dhuna e vazhdueshme në familje.
Duke iu referuar dëshmive të motrës të së ndjerës, Genta Arrazi tregon se Ergysi e kishte tradhëtuar disa herë Almën, por kjo e kishte falur për hir të fëmijëve. Por kulmi ishte kur Alma i ka kontrolluar telefonin dhe ka gjetur një video të burrit me të dashurën më të re, 18 vjeçare dhe natën që u vetëvra ajo i pa duke kaluar me makinë në qytet. m.p.
