Një tjetër sezon, një tjetër sfidë, për një tjetër aventurë në nivelin më të lartë të kampionatit italian të volejbollit për femra. Pas dy sezoneve mjaft të mira në nivelin e dytë, në Serinë A2 me LPM Mondovinë, që u pasuan nga dy sezone të tjera një shkallë më lart, në Serinë A1, ku spikati fitimi i Kupës së Italisë dhe ai i titullit të kampiones së Evropës me Novarën sezonin e shkuar, por edhe vendi i dytë në kampionat dhe arritja në finale të Kupës së Italisë me Busto Arsizion, Erblira Bici është gati për një sfidë të re.
Sipas asaj që raporton faqja prestigjioze sportive italiane në Internet, Sportmediaset.it, diagonalistja shqiptare është zgjedhur nga skuadra e Granda Kuneo Volejit për të zënë vendin e lënë bosh nga largimi i Lizë Van Hekes drejt ekipit të Monzës. Ndonëse ende nuk ka asnjë konfirmim zyrtar as nga vetë lojtarja e as nga klubi i mundshëm i saj për sezonin e ardhshëm, janë mediat italiane që e bëjnë fakt të kryer një lajm të tillë për 24-vjeçaren shqiptare.
Madje mediat lokale në zonën e Mondovisë, në skajin veriperëndimor të Italisë, kanë shprehur kënaqësinë për rikthimin e një njohjeje të vjetër të volejbollist të zonës, siç është kapitenia kuqezi, por jo tanimë me ish-skuadrën e saj, LPM-në, që vazhdon të militojë në Serinë A2. Edhe këto media e bëjnë fakt të kryer kalimin e volejbollistes 1 m e 86 cm të lartë tek skuadra tjetër e zonës, Kuneo, çka do t’i mundësojë Bicit vazhdimësinë në Serinë A1.
Në ditët në vijim pritet edhe zyrtarizimi i këtij transferimi për volejbollisten shqiptare më të spikatur të momentit.
