Kryeministri Edi Rama ka mohuar që të ketë marrë nga presidenti Ilir Meta platformën me 14 pika, e cila u bë publike sot. Ndryshe nga sa pretendoi Meta, Rama thotë se kjo platformë nuk i ka mbërritur ende.
Megjithatë, kreu i Qeverisë nuk ka kundërshtuar propozimin e Presidentit për krijimin e një Këshilli Politik, ku ndër të tjera aty kërkohet të diskutohen edhe ndryshimet në ligjet e gjyqësorit.
“Presidenti nuk më ka dorëzuar asnjë platformë, por jam gati të ulem në çdo moment me të, me opozitën brenda/jashtëparlamentare e me partnerët e Reformës në Drejtësi, që t’i vëmë pikat mbi “i” të gjitha pikave të të gjitha palëve në shqip/anglisht, se teatri ra, iku e na la maskat.
Jemi në prag të miratimit të Planit të Veprimit për Negociatat në Këshillin Kombëtar të Integrimit, s’ka rast më të mirë që Presidenti, Opozita, Institucionet e Drejtësisë,Partnerët Ndërkombëtarë për Drejtësinë dhe Integrimin, të mblidhen URGJENT në një tryezë me karta të hapura
Presidenti t’i lerë apelet natën për 20 burra e ditën për 11 pika! Opozita t’i lerë ultimatumet trupore e sharjet fëminore! Të dy bashkë ta lenë teatrin e mbledhjeve të komitetit të shpëtimit, se Shqipëria, parlamenti, qeveria, s’kanë kohë të luajnë “e ka kush e ka” derzhurnin”, shprehet Rama.
Ndërkohë nga Shtetet e Bashkuara të Amerikës po vijnë mesazhe të ashpra kundër çdo përpjekje për marrëveshje të fshehtë “për të vrarë reformën në drejtësi”.
