Mbrojtësi i kombëtares shqiptare të futbollit, Mërgim Mavraj u kthye në një problem të madh në muajin Shkurt për skuadrën e Greuther Furth, për shkak të dëmtimit që pësoi, por koha e karantinës duket se i ka bërë mirë. Futbollisti i formacionit gjerman, do të rikthehet në ndeshjet zyrtare në fillim të qershorit.
Kohën e izolimit ai e ka shfrytëzuar për të rikuperuar formën fizike dhe tani problemet janë lënë pas. Edhe pse Mavraj kreu të gjitha ritualet e mundshme gjatë muajit të Ramazanit, duke përfshirë dhe agjerimin, stërvitja e tij nuk është cënuar, dhe lojtari i cili nuk e sheh fushën prej shkurtit, tani konfirmon se është në dispozicion të trajnerit.
“Do të rikthehem shumë shpejt në 100% dhe do të ndihmoj Greuther Furth” tha Mavraj. Mbrojtësi nga Kosova që gëzon edhe nënshtetësi gjermane, braktisi Ingolstadt në verë për tu rikthyer te Greuther Furth, aty ku tifozët e duan shumë.
Mbetet për tu parë ndërkohë përfshirja e mbrojtësit në kombëtaren shqiptare, pasi duket se trajneri Reja e ka 33 vjeçarin jashtë orbitës, dhe tani mbrojtjen e kuqezinjve e mendon pa një lojtar si Mavraj, që për shumë fushata eliminatore, mbajti peshën e liderit.
