Policia e Shkodrës ka arrestuar një 50-vjeçar shqiptar, i cili ishte në kërkim nga autoritetet amerikane. Arrestimi i tij vjen shtatë vite pasi kreu një vrasje në Shtetet e Bashkuara të Amerikës.
Policia bën të ditur se në pranga është vënë Arben Bregu, 50 vjeç, banues në Shkodër me akuzën e vrasjes.
Mësohet se 50-vjeçari fshihej në lagjen “Skënderbeg” në Shkodër, ndërsa kishte filluar edhe këtu veprimtarinë kriminale.
“Ky shtetas ishte shpallur në kërkim ndërkombëtar, pasi në vitin 2016, Gjykata e Katërt Gjyqësore në Duval, Florida e ka shpallur fajtor për vrasjen e një personi.
Ky shtetas, në qershor 2013, në qytetin Duval, Florida, jashtë një restoranti, ka qëlluar disa herë me armë zjarri një shtetas, pas një konflikti mes tyre”, thuhet në njoftimin e policisë.
Interpol Tirana, në bashkëpunim me Ambasadën Amerikane dhe Interpol Washington po vijon procedurat për ekstradimin e këtij shtetasi drejt shteteve të Bashkuara të Amerikës./l.m/Fjala.al
