Gazeta “Fjala” zbulon lëvizjen e mazhorancës për të bërë ndryshime ligjore që kërkojnë 84 vota, ku i heq disa kompetenca kreut të shtetit, duke e kushtëzuar kandidaturën e numrit një të KLSH-së me kritere të reja. Kreu i Kontrollit të Lartë të Shtetit në “dorë” të presidentit si propozim, por me “imponimin” e mazhorancës
Sagës për zgjedhjen e kreut të Kontrollit të Lartë të Shtetit do t’i japë fund grupi parlamentar i Partisë Socialiste. Deputetët po hartojnë një nismë për ta ndryshuar ligjin për Kontrollin e Lartë e Shtetit, i cili do t’i japë fund, sipas tyre, jo vetëm zgjedhjes së kreut të ri, por edhe problemit që drejtuesi i ri KLSH-së të jetë brenda kritereve ligjore. Burime nga grupi parlamentar i Partisë Socialiste, bëjnë të ditur për gazetën “Fjala” se po punojnë për hartimin e ndryshimeve ligjore, të cilat do të shërbejë si mekanizëm zhbllokues për t’i hapur rrugë më pas zgjedhjes së kreut të ri të Kontrollit të Lartë të Shtetit. “Lufta” për zgjedhjen e kreut të ri të Kontrollit të Lartë të Shtetit mes presidentit dhe mazhorancës qeverisëse vazhdon prej dy vitesh, kohë në të cilën ka përfunduar mandati i kreut aktual të këtij institucioni, Bujar Leskaj.
Përplasja
Mazhoranca qeverisëse ka rrëzuar tri kandidatura të presidentit, Ilir Meta, për kreun e Kontrollit të Lartë të Shtetit e konteston edhe kandidatin e katërt me dy argumente. I pari, dr. Arben Shehu, sipas përfaqësueve të mazhorancës nuk e plotëson kushtin e përcaktuar në ligjin për KLSH-në, në nenin 20 të të cilit thuhet se drejtuesi i këtij institucioni duhet të ketë të paktën 10 vjet eksperiencë në fushën e financave. Në jetëshkrimin e kandidatit të presidentit nuk është evidentuar asnjë ditë eksperiecë në këtë fushë. E dyta, dr. Arben Shehu nuk është në listën me 34 kandidatë që presidenti i ka dorëzuar Kuvendit më 2 nëntor të vitit 2018. Burime nga grupi parlamentar i Partisë Socialiste bëjnë të ditur për gazetën “Fjala” se po punojnë për një nismë të re ligjore, pasi presidenti nuk ka bërë konkurs, sipas kritereve ligjore për zgjedhjen e kreut të ri të KLSH-së.
Lista me kandidatët
Në nëntor të vitit 2018, institucioni i Presidentit të Republikës ka publikuar listën me emrat e kandidatëve që kanë aplikuar për pozicionin kushtetues të Kryetarit të Kontrollit të Lartë të Shtetit. Bëhet fjalë për 34 kandidatë që shprehin interes për të marrë pjesë në garë. Pak ditë pasi u publikua lista, më 5 nëntor, presidenti propozoi për zgjedhjen në krye të KLSH-së të Vitore Tushës, e cila nuk mori miratimin e Parlamentit. U desh të kalonin 3 muaj që presidenti të propozojë një tjetër kandidaturë. Kësaj here kreu i shtetit i propozoi Kuvendit që të zgjedhë për të drejtuar KLSH-në Bahri Shaqirin. Edhe ky propozim i kreut të shtetit nuk kaloi në Parlament. Më pas, në korrik të po atij viti, presidenti Meta propozoi Petraq Milon për postin e kreut të KLSH-së, por nuk mori miratimin e mazhorancës. Kandidatura e katërt e presidentit është propozuar në 4 qershor dr. Arben Shehu. Mazhoranca ka rrëzuar kandidaturat e presidentit me argumentin se ato janë në kundërshtim me ligjin.
KRYETARI I KONTROLLIT TË LARTË TË SHTETIT
Neni 19
Zgjedhja dhe qëndrimi në detyrë
- Kontrolli i Lartë i Shtetit drejtohet dhe përfaqësohet nga kryetari i Kontrollit të Lartë të Shtetit.
- Kryetari i Kontrollit të Lartë të Shtetit zgjidhet nga Kuvendi, me propozim të presidentit të Republikës, për një mandat shtatëvjeçar, me të drejtë rizgjedhjeje.
- Paga e kryetarit të Kontrollit të Lartë të Shtetit është e barabartë me atë të kryetarit të Gjykatës së Lartë.
Neni 20
Kushtet për t’u zgjedhur
Kryetar i Kontrollit të Lartë të Shtetit duhet të zgjidhet shtetasi shqiptar që plotëson kushtet e mëposhtme:
- a) ka arsim të lartë në ekonomi, financë ose drejtësi;
- b) përvojë profesionale në çështje financiare;
- c) ka kualifikime të larta profesionale dhe përvojë pune në profesion jo më pak se 10 vjet;
ç) gëzon integritet të lartë moral dhe profesional;
- d) nuk është dënuar më parë për kryerjen e një krimi me vendim gjyqësor të formës së prerë.
Kandidaturat e presidentit
5 nëntor 2018
Presidenti propozon për kryetare të Kontrollit të Lartë të Shtetit Vitore Tushën, gjyqtare në Gjykatën Kushtetuese
21 janar 2019
Përmes një njoftimi nga zyra e Presidencës mësohet se është përzgjedhur Bahri Shaqiri si kandidat për kreun e KLSH-së
17 korrik 2019
Presidenti i Republikës vendosi t’i propozojë Kuvendit si kandidat për postin e kryetarit të KLSH, prof. dr. Petraq Milo
4 qershor 2020
Presidenti Ilir Meta i ka dërguar Kuvendit propozimin për zgjedhjen e dr. Arben Shehut si kryetar i Kontrollit të Lartë të Shtetit
Kush e ka drejtuar KLSH-në
Blerim Çela anëtar kryesie i Partisë Demokratike, deputet, e drejtoi KLSH-në në vitet 1992-1997
Mustafa Kërçuku kryetar i Ballit Kombëtar, aleat i PD-së, në vitet 1997-2004
Robert Çeku zëvendësministër Financash, deputet i PD-së, në vitet 2004-2011
Bujar Leskaj deputet i PD-së, ministër Kulture, nga 2011 e në vazhdim.ka.ta/Fjala.al/
