Portieri i Kombëtares Shqiptare të Futbollit, Gentian Selmani është duke kaluar një moment shumë të mirë në kampionatin turk.
Selmani ka luajtur për plot katër sezoni me klubin e Laçit në Superiore dhe vetëm në merkaton e verës së kaluar 21-vjeçari u transferua te klubi Menemen Spor në Ligën e Dytë turke.
Portieri shqiptar ka treguar një performancë shumë të mirë në klubin turk, me të cilin ka luajtur 17 ndeshje si titullar.
Këta pesë muaj në kampionatin turk kanë bërë që emri i shqiptarit të përflitet goxha në merkaton e dimrit, madje nga mediet vendase behët me dije se skuadra nga Gjermania e Italia janë të interesuara për të.
Kjo është konfirmuar nga vetë trajneri i Menemen Spor, Cenk Lalec, i cili ka thënë se pavarësisht ofertave Selmani do të qëndrojë me klubin turk deri në fund të sezonit.
“Klubi ka oferta nga Gjermania dhe Italia për Selmanin. Megjithatë, kemi vendosur që portieri të mos lëvizë”,-deklaroi tekniku./Fjala.al/
