Si do të përdoret informacioni i marrë në rrugë operative dhe pastërtia e figurës së efektivëve të policisë që do të varet edhe nga “informatorët” jashtë radhëve policore
Kontrolli i figurës së punonjësit të policisë do të kryhet mbi bazën e analizës së të dhënave që disponohen në strukturat e analizës së informacionit të Policisë së Shtetit, Shërbimit për Çështjet e Brendshme dhe Ankesat, si dhe në agjencitë e tjera informative dhe ligjzbatuese në Republikën e Shqipërisë.
Në dosjen për verifikimin e figurës do të jenë edhe deklarimet dhe informacionet nga Shërbimi Informativ i Shtetit, për të dhënat që ky institucion disponon dhe të dhënat që vijnë nga bashkëpunimi me Autoritetin për Informimin mbi Dokumentet e ish-Sigurimit të Shtetit. Në draft parashikohet se objekti i kontrollit të figurës është verifikimi i deklarimeve të punonjësit dhe i të dhënave të tjera, me qëllim verifikimin e vërtetësisë dhe besueshmërisë së deklarimeve, si dhe identifikimi i atyre që janë të përfshirë apo kanë kontakte të papërshtatshme me personat e përfshirë në veprimtari kriminale.
Njësia e burimeve njerëzore e vendos deklaratën për kontrollin e figurës në dosjen përkatëse, të çelur për punonjësin, dhe e dërgon në komisionin përkatës të vlerësimit. Në projektligj është parashikuar se verifikimi i figurës së punonjësit realizohet nëpërmjet kontrollit të deklarimeve dhe marrjes së informacionit nga Drejtoria e Sigurisë së Informacionit të Klasifikuar, për të dhënat që ky institucion disponon dhe kontrollit të deklarimeve dhe marrjes së informacionit nga Drejtoria e Përgjithshme e Parandalimit të Pastrimit të Parave.
Do të merren të dhëna edhe nga prokuroritë e gjykatat, në rast se punonjësi ka qenë apo është subjekt i procedimeve penale.
Bashkëpunimi për kontrollin e figurës
- Për kontrollin e figurës së punonjësit organet e vlerësimit i drejtohen Drejtorisë së Sigurisë së Informacionit të Klasifikuar, Shërbimit Informativ të Shtetit, Autoritetit për Informim mbi Dokumentet e ish-Sigurimit të Shtetit, Drejtorisë së Përgjithshme të Parandalimit dhe Pastrimit të Parave, Shërbimit për Çështjet e Brendshme dhe Ankesat, për informacione ose të dhëna të tjera që mund të kenë këto institucione, ose shërbimeve të tjera informative, brenda vendit.
- Organet e vlerësimit u drejtohen për informacion edhe strukturave apo njësive të Drejtorisë së Përgjithshme të Policisë së Shtetit, të cilat mund të kenë informacion.
- Drejtoria e Sigurisë së Informacionit të Klasifikuar ose Drejtoria e Përgjithshme e Parandalimit të Pastrimit të Parave, me kërkesën e organeve të vlerësimit, komunikon me shtetet e huaja për të marrë informacionin e nevojshëm për personat e përfshirë në veprimtari kriminale ose për personat e dyshuar si të tillë, për qëllim të këtij ligji.
- Institucionet e tjera publike, që mbledhin dhe përpunojnë informacion, vënë në dispozicion të dhënat për punonjësit, personat e lidhur ose personat e tjerë, sipas kërkesave të organeve të vlerësimit.
