Bashkëkryetarja e Komisionit të Reformës Zgjedhore, Rudina Hajdari akuzoi në parlament se mazhoranca dhe opozita nuk i duan listat e hapura dhe i vetmi rezultat i tryezës ishte identifikimi biometrik i zgjedhësve.
“E kuptoj Edi Ramën që thotë nuk e dua ndryshimin e sistemit, e di që ky person do shkojë në pension politik po i hapi listat. Si ka mundësi që kjo opozitë do të rrijë ashtu siç është, nuk do t’i hapë listat. Nuk e do depolitizimin e administratës zgjedhore, çfarë bën ky njeri, pse do ta ruaj këtë status quo?
Opozita bëri revolucion, me flakë dhe molotov për çfarë për tenderin e identifikimit biometrik. Më vjen keq që u ula në atë tryezë për këtë gjë, por u ula për të përfaqësuar qytetarët në këtë tryezë.”, tha Rudina Hajdari.
Kryeministri Edi Rama iu përgjigj deputetes Hajdari, lidhur me detajimin e reformës zgjedhore, ku deklaroi se ka një proces që është ende i papërfunduar si rezultat i zvarritjes që po i bën opozita.
Rama tha se përtej lëshimeve, Partia Socialiste ka edhe ajo interesat e veta, sepse edhe përgjegjësinë e ka shumë më të madhe dhe ndikimin në fatet e vendit, e ka shumë më të madh. Kreu i qeverisë tha se ka një gjë në politikë që nuk mund të kapërcehet që është koha.
“Ju e kapërcyet atë moment kohor duke u mjaftuar me rënien e daulleve, lista të hapura dhe pa bërë asgjë tjetër dhe pa marrë në konsideratë që PS nuk është fondacioni popullit. Ju kujtohet fondacioni “Populli”, gjenerali Rrapush”, deklaroi Rama.
Ai kujtoi kur i thoshte liderit të opozitës, “Lulzim mos rri rrugëve, se nuk i pengon dot zgjedhjet. Hajde i thashë që mbi projektin për zgjedhjet vendore, të ngremë sistemin e plotë për zgjedhjet e ardhshme kombëtare. Sa nga Astiri tek Teatri, bum andej këtej dhe në fund ja ku erdhën ta lëmë siç e kemi”.
Ai tha se duhet të dakordësohen se ka një marrëveshje, për të reflektuar rekomandimet e OSBE-ODHIR.
Sipas tij, vijnë me propozime ekstravagante për KQZ-në, ndërkohë që është lënë dakord për depolitizim. “Tani çudia e madhe është që jo në zgjedhjet e ardhshme vendore, por në zgjedhjet e përgjithshme, pasi mendojnë se do të mbeten ende në opozitë”, deklaroi Rama.
Rama shtoi se PS nuk është noter i çdo teke dhe çdo kohe dhe se për të listat e hapura nuk janë tabu./Bl.Ba/Fjala.al
