Historia horror në Mallakastër, ku tre të rinj masakruan dhe tentuan të zhdukin trupin e një gruaja, sjell detaje tronditëse nga vendi i ngjarjes. Gruaja iu ka bërë kafe djemve, pasi i ka konsideruar njerëz të familjes. Një dëshmitar, që është edhe kushëriri i afërt i burrit të saj tregoi se në shtëpi janë gjendur filxhanët e kafesë, që do të thotë se gruaja është qëlluar pasi iu ka bërë kafenë.
Kunati i 50-vjeçares Drita Saliaj që u gjet e vrarë pasditen e sotme në fshatin Gjerbës të Mallakastrës ka treguar detaje të tjera para se viktima të mbytej me shall dhe të hidhej në rezervuar nga nipi i saj. Lazer Saliaj tregon se para Vitit të Ri kishte qenë në shtëpinë e kunatës bashkë me gruan e tij ku kanë pirë kafe dhe më pas është larguar menjëherë drejt Greqisë për te fëmijët, për tu rikthyer vetëm dy ditë më parë.
“Jam thirrur në orën 1:00 të natës në polici dhe kam shkuar atje për një sqarim dhe më kanë thënë; ke informacion për kunatën! Unë i thashë jo! E kam takuar me datë 28 dhjetor pimë kafe, e pyeta ke ndonjë hall, më tha jo, jam mirë po më dërgoni disa fruta lart.
Ia dërguam po atë ditë, dhe pastaj kam ikur në Greqi dhe u ktheva të dielën. Dje gjatë natës erdha me punonjësit e policisë, provuam derën, ishte e mbyllur, thirrëm nga dritarja dhe prapë nuk dëgjuam gjë dhe kështu kemi ndenjur deri në orën 6.
Policia na tha që kshu-kshu, autorët janë kapur dhe pastaj shkuam te rezervuari se mesa duket autorët kanë treguar që e kishin hedhur aty. Është 6-7 km larg nga këtu. Shkuam atje nxorëm viktimën. Autorët i njoh, njërin e kam djalin e kushëririt të parë.
Ata kishin pirë kafe, se dy filxhanë kishte aty, meqë ishin të afërt ajo i ka pranuar brenda. Njëri nga ata është djali i kushëririt të parë, është djali i djalit të xhaxhait tim, është brenda dhe ai vetë, i ati. Ata e kishin kthyer shtëpinë, përmbys si duket për punë lekësh. Kjo ka ndodhur të dielën në darkë” – tregoi Lazer Saliaj. Fjala.al/
