Ish-ministri i Financave dhe ish-anëtari i Këshillit Mbikëqyrës të Bankës së Shqipërisë, Arben Malaj denoncoi sot nga foltorja e Kuvendit kryeministrin Edi Rama.
Duke shprehur keqardhjen e tij lidhur me votimin nga deputetët në Komisionin Hetimor, Malkaj tha se Edi Rama është kthyer në një njeri të frikshëm për ata dhe vetë familjet e tyre.
Arben Malaj tha gjithashtu se çështjen e shkarkimit të tij do ta çojë në Gjykatën Kushtetuese. Ndërsa shpjegoi se Rilindja po i bën një gjyq politik.
“Sot rilindja po bën një gjyq politik. Nuk është hera e parë që më kërkojnë të më shkarkojnë. Në 1997 Berisha i kërkoi shkarkimin tim Finos, por kërkesa e tij ra. Kjo është hera e tretë që kërkohet shkarkimi im, por e përsëris me zë të lartë: kam kryer më së miri detyrën time. Kam kërkuar në bord që të demokratizohet qeverisja e Bankës së Shqipërisë. Kam votuar pro ose kundër me përgjegjësi të lartë dhe të thellë. Në komision ndjeva trishtim për votimin rresht të deputetëve dhe i mirëkuptova sepse Edi Rama është bërë i frikshëm jo vetëm për ta, por edhe për familjet e tyre. Keni goditur shpesh pas shpine shoku Rama, por unë nuk e kam bërë asnjëherë. Sapo të krijohet Gjykata Kushtetuese do ta ballafaqoj këtë çështje atje”, -tha Malaj./Fjala.al
