Kryeministri Edi Rama, po merr pjesë në Forumin Ndërqeveritar të bashkëpunimit rajonal të vendeve të Evropës Qendrore dhe Jugore (InCe). Kjo nismë po zhvillohet në ambientet e Ministrisë së Jashtme të Italisë dhe do të drejtohet nga kryeministri italian, Giuseppe Conte.
Në Forum marrin pjesë 17 vende, 9 prej tyre janë anëtare të Bashkimit Europian, Bullgaria, Kroacia, Italia, Polonia, Republika Çeke, Rumania, Sllovakia, Sllovenia e Hungaria. 5 janë vende në perspektivën e hyrjes në BE si Shqipëria, Serbia, Maqedonia e Veriut, Bosnja, Hercegovina e Mali i Zi, si dhe 3 vendet e tjera Moldavia, Ukraina e Bjellorusia.
Të pranishëm në Forum janë kryeministrat Edi Rama, Andrej Plenkovic, Zoran Zaev, Ion Chicu, Dusko Markoviç dhe Ana Brnabiç. Vetë kreu i qeverisë, Rama, ka njoftuar në Facebook pjesëmarrjen në këtë aktivitet.
“Romë – Samiti i vendeve të Nismës së Evropës Qendrore (CEI) nën drejtimin e Italisë mike, një mundësi më shumë për të nxitur pjesëmarrjen dhe angazhimet konkrete në Konferencën e Donatorëve për Rindërtimin pas tërmetit të 26 nëntorit”,– shkruan në Facebook kryeministri Rama./Fjala.al/
