Tërmeti i fuqishëm i 26 nëntorit dëmtoi rëndë godinën e QSUT-së ku gjendeshin qindra pacientë në Spitalin nr 1, i njohur si objekti gjashtëkatësh. Përjetimi i pacientëve, familjarëve të tyre, por edhe e stafit mjekësor dhe personelit ndihmës ishte i madh, veçanërisht në dy katet e para ku ndodhen pavionët; (Kardiologjia një dhe dy).
Ndonëse pacientet e këtyre dy pavioneve, që ndodheshin në katin e parë dhe të dytë u evakuuan që në mesditën e 26 nëntorit, situata mbeti e rëndë edhe në ambientet e tjera në të gjitha godinën gjashtëkatëshe, ku janë rreth 400 pacientë, staf mjekësor dhe ndihmës. QSUT, pavarësisht një dokumenti zyrtar nga Instituti i Ndërtimit, që urdhëron: “Të mos lejohet aktiviteti në ambientet e dëmtuara, deri në riparimn e dëmeve”, nuk ka larguar pacientët që ndodheshin në katër katet e tjera si reparti i Hematologjisë, Nefrologjisë, të Sëmundjeve të Brendshme dhe Endokrinologjisë.
Në dokumentin që disponon “Fjala.al”, Instituti i Ndërtimit kryen inspektim zyrtar për të verifikuar dëmet e shkatuara dhe mbi të gjitha për të përcaktuar nëse përbën rrezikshmëri ose jo. Më datë 30 nëntor, kreu i Institutit të Ndërtimit Agron Hysenlliu, bashkë me inxhinier Gerti Çela, kryejnë ekspertim mbi godinat e dëmtuara dhe konkretisht ndalen për objektin gjashtëkatësh, i cili pati raportime se kishte pësuar dëmtime të ndjeshme.
Në përshkrimin e situatës, në referim: “Sistemi Konstruktiv i objektit”, thuhet: -Tre kolona betonarme, me mure veshëse, konstatohet; -“Nuk ka probleme në strukturë, ka probleme në muret veshëse dhe suva”. Por ndërsa rreziku i dëmtimit strukturor u përjashtua, dëmtime serioze evidentoheshin në rënien e suvave dhe çarje të mureve, në atë që ekspertët e konsiderojnë ‘dëme në rifiniturë’ që paraqisnin rrezikshmëri në të gjithë godinën.
Në përfundim të konkluzionit të ekspertëve Hysenlliu dhe Çela, konstatohet: “Të mos lejohet aktiviteti në ambientet e dëmtuara, deri në riparimin e dëmeve”. Me këtë akt-ekspertim, normalisht duhet të ishte pezulluar menjëherë çdo aktivitet në të gjashtë katet e godinës, pavarësisht se dëmet më të mëdha ishin në dy katet e para. Nga burime të “Fjala.al” mësohet se aktiviteti i shërbimit ka vijuar, pavarësisht konstatimit të ekspertëve.
Me përjashtim të dy pavionëve (Kardiologjia një dhe dy), të cilët dukshëm pësuan dëmtime serioze. Drejtues të QSUT-së diskutuan për evakuimin e të gjithë paciantëve, por për mungesë ambientesh u vendos që të akomodoheshin pranë ambienteve të Urgjencës 1, pacientët e dy kardiologjive, bashkë me stafin, pjesa tjetër ka vijuar punën edhe pas dëmeve të shkaktuara nga tërmeti.
“Në ditën e parë të tërmetit konstatuam dëme në çdo kat, veçanërisht në katët 1 dhe dy, por e gjithë godina kishte pësuar dëme të dukshme”-shprehen punonjësit. Burime konfidenciale për “Fjala.al” konfirmojnë se në dy ditët e para pas tërmetit është kërkuar nga një pjesë e stafit drejtues të këtyre pavionëve që të shihet mundësia e lëvizjes, por për mungesë të hapësirave të tjera kanë qëndruar në ato ambiente, duke rrezikuar serizisht nga një lëkudje tjetër e fortë e tërmetit. Punonjësit shprehen se në çdo kat të godinës ka dëmë të duskshme, por në javën e fundit ka pasur ndërhyrje në riparimin e dëmeve, por kryesisht sipërfaqësore, duke mbuluar pjesët e çara të mureve./Fjala.al
