Në ndihmë të familjeve të prekura nga tërmeti i 26 nëntorit janë bashkuar edhe artistët e Filarmonisë së Vjenës. Violinisti shqiptar me famë ndërkombëtare, Shkëlzen Doli është nismëtari i organizimit të një koncerti për t’u solidarizuar me familjet e prekura nga tërmeti. Të ardhurat nga koncerti i filarmonisë prestigjioze do t’i shtohen ndihmave për familjet në nevojë në Durrës dhe Thumanë.
“Me iniciativë të violinistit të mirënjohur shqiptar Shkëlzen Doli dhe me mbështetjen e kolegëve të tij, anëtarë të Filarmonisë së Vjenës, më 30 Dhjetor 2019, ora 19:00, në sallën “Ehrbar- Saal, Mühlgasse” Vjenë, do të jepet një koncert me valse dhe polka nga Dinastia Strauss.
Të ardhurat nga shitja e biletave do të shkojnë në ndihmë të familjeve të prekura nga tërmeti i 26 nëntorit.
Ambasada e Shqipërisë në Vjenë falënderon artistët për solidaritetin dhe kontributin e tyre.”- thuhet në deklaratë. /fjala.al/
Burimi: albanianews,it
