Pas më shumë se 14 orësh ka mbërritur më ne fund në Vlorë trageti me 150 pasagjerë në të.
Moti i keq, era e fortë dhe stuhia e orëve të fundit kanë trazuar detin e për pasojë mjetet detare janë përballur me një rrugë të vështirë.
Moti i keq me reshje të dendura, të cilat pritet të zgjasin deri në mbrëmjen e së hënës, do të minimizojë këto lëvizje. Orë më parë autoritetet kanë treguar se duhet të bëhet kujdes me daljet në det përgjatë këtyre dy ditëve.
Në qytetin bregdetar të Vlorës mësohet se intensiteti i reshjeve të shiut ka qenë mbi 30 milimetra. Fatmirësisht, deri tani nuk ka probleme në qytet dhe rrugët janë të hapura.
Ndërkohë, lundrimi detar është pjesërisht i pezulluar për anijet e vogla, ndërsa trageti i linjës Brindisi-Vlorë ka mbërritur në port.
Deti është me fuqi 8 ballë dhe shpejtësia e erës që fryn nga jugu 18-20 m/s, bëjnë të ditur autoritetet nga porti i Vlorës.
Bëhet me dije se në portin e Vlorës, ka mundur të ankorohet trageti “St Damian”, i nisur nga Brindisi i Italisë, pas 14 orësh udhëtim mes dallgëve dhe motit të keq.
Udhëtarët pasi zbritën në tokë, u shprehen se janë torturuar nga udhëtimi i gjatë dhe pritja në radhë e tragetit për t’u ankoruar.
“Kemi bërë 7 orë rrugë, jemi edhe 14 orë në radhë, u torturam”, shprehen ata ndërkohë që ka vijuar ankthi i kohës së keqe. Me të njëjtat probleme vonesash po përballen edhe udhëtarët e linjave ajrore.
Askush nuk mban asnjë përgjegjësi ndërkohë që kompania ‘Ernest’ është denoncuar dy ditë më parë. Edhe linja detare Durrës-Bari është shfaqur me probleme të mëdha pak ditë më parë.
Qytetarët që u dëmtuan nga kjo linjë bënë me dije se kanë tentuar të denoncojnë po askush nuk i merr në konsideratë.
Autoritetet portuale por edhe ata të aeroportit nuk përgjigjen për asnjë dëmtim që iu ndodh shqiptarëve me kompanitë e tyre të udhëtimit. /Fjala.al/
