Ekipi i Partizanit i është rikthyer fitoreve pas disa kohësh jo fort të mira për të, duke mundur sot në “Selman Stermasi” skuadrën e Vllaznisë me rezultatin 1 me 0. Sapo është mbyllur ndeshja midis kryeqytetasve dhe shkodranëve dhe tifozët e “Demave të kuq” kanë rimarr veten pas humbjes befasuese me Tiranën në derbin më të fundit kryeqytetas.
Partizani ka shënuar golin e tij të vetëm në këtë sfidë në minutën e 62-të, me anë të Eneo Bitrit. “Demat e kuq” arritën që të zhbllokonin rezultatin, duke kaluar në avantazh pas një pjese të parë jo fort të mirë dhe të plogësht në dukje.
Në pjesën e parë por edhe të dytën ekipet u karakterizuan nga një lojë e kujdesshme, me pak raste për shënim, por ajo që duhet theksuar është fakti se topi u mbajt më shumë nga shkodranët që bënë një lojë për t’u lavdëruar.
Pjesa e parë ishte tepër e vakët, me shumë pak raste shënimi nga të dyja skuadrat. Pasime të gabuara dhe një ritëm jo i lartë, karakterizuan këtë 45 minutësh të parë.
Edhe pjesa e dytë nisi e tillë, por goli i Bitrit i dha ngjyrë sfidës dhe skuadrat u hapën, duke humbur raste të tjera. Por ata që kanë marrë rezultatin dhe pikët e kësaj sfide ishin “Demat e kuq” që kanë shënuar me anë të Bitrit.
Këto pikë janë shumë të rëndësishme për kampionët ende në fuqi të Superligës. Ky gol erdhi pas shumë tentativash dhe mundimi, pasi Partizani ka shfaqur një performancë të dobët deri tani si në takimin e fundit ashtu edhe në takimet e kaluara.
Me këtë fitore Partizani ka shkuar në kuotën e 28 pikëve, po kaq sa ka dhe Tirana, por të kuqtë ndodhen në vendin e katërt. Ndërsa Vllaznia mbetet në kuotën e 23 pikëve në vendin e shtatë.
Megjithatë, siç është bërë edhe zakon tashmë për fitoret e Partizanit, ka qenë tifozeria e të kuqve që ka ndezur shkallët e stadiumit të kryeqytetit me gjithë motin aspak të favorshëm./Fjala.al/ Përgatiti: K.T./
