Dëmet materiale që la pas tërmeti i 26 nëntorit pritet të përballohen me një fond prej 20 miliardë lekësh, të cilat janë parashikuar në buxhetin e vitit 2020.
Motoja “rimëkëmbje dhe vazhdimësi” ka shërbyer për hartimin e buxhetit të viti të ardhshëm, i cili është mbështetur në funksion të përballimit të pasojave që la pas tërmeti.
Përveç fondit 1 miliardë lekë për subvencionin e qirave, për të pakën një vit, për 6000 familje, qeveria ka hartuar një plan edhe për riparimin e shtëpive të dëmtuara dhe rindërtimin e atyre që janë shembur.
Bilanci paraprak i objekteve të shembura dhe atyre të dëmtuara rëndë arrin në 6697 në qarqet Tiranë, Durrës, Elbasan, Lezhë, Kukës e Dibër. Pasi të arrihen marrëveshjet për objektet që do të financohen e ndërtohen nga donatorët, qeveria do të ndërtojë e riparoja objektet e tjera brenda vitit me fondin prej 20 miliardë lekësh.
Sipas bilancit paraprak janë 1183 shtëpi të shembura, në Durrës 1050, në Tiranë 131, dhe në Dibër 2. Ndërkohë shtëpi të dëmtuara rëndë janë 5514 nga të cilat në Durrës janë 3838, në Tiranë 1311, në Lezhë 168 në Kukës 150, në Dibër 13 dhe Elbasan 34 shtëpi.
Pallate të dëmtuara rëndë janë 558, në Durrës 35, në Tiranë 461, në Lezhë 56, në Kukës 4 dhe në Dibër e Elbasan dy pallate. Gjithashtu në Tiranë janë edhe 20 pallate të pabanueshme
Bonusi i qerasë
Në relacionin e aktit normativ për rindërtimin vlerësohet së subvencionimi i qirasë për një vit për rreth 6000 familje të jetë rreth 1 miliard lekë dhe do të përballohen kryesisht nga buxheti i shtetit.
Në relacion thuhet se lista e plotë pritet të përditësohet, por sipas të dhënave të mësipërme rezultojnë rreth 6,697 familje në banesa, ndërkohë që numri i familjeve që banojnë në pallatet e dëmtuara rënde dhe ato që janë shembur nuk është i raportuar.
Nisma ligjore e Qeverisë, është ndërmarrë për shkak të situatës së krijuar pas tërmetit 6.4 të shkallës Rihter, që goditi Shqipërinë në datën 26.11.2019 . Gjendjen e fatkeqësisë natyrore në qarqet Durrës, Lezhë dhe Tiranë, do të jetë në fuqi deri në fund të marsit.
Për përfitimin e subvencionit të pagesës së qirasë, sipas këtij akti normativ, familjet aplikojnë pranë njësisë së vetëqeverisjes ku kanë vendbanimin e tyre, duke dorëzuar dokumentacionin, si më poshtë vijon: a) Formularin e aplikimit, sipas formatit bashkëlidhur këtij vendimi; b) Aktkonstatimin e Institutit të Ndërtimit; c) Certifikatën familjare; ç) Numrin e llogarisë bankare ku do të derdhet pagesa e qirasë./Fjala.al/
