Ashtu siç ishte parashikuar, disa të dënuar, kryesisht gra, të mitur dhe të moshuar, kanë përfituar nga amnistia dhe do të kalojnë festat e fundvitit jashtë qelive.
Në një dalje publike ministrja e Drejtësisë Etilda Gjonaj tha se nga 56 gra të dënuara me burg, 28 prej tyre kanë fituar lirimin e menjëhershëm nga këto institucione. Ndërkohë për disa të tjera do të ketë ulje të dënimit me 1/3.
“Nga 56 gra të dënuara, u vendos për lirim të menjëhershëm për 28 gra. Ndërsa 28 gra përfitojnë me ulje të 1/3 e dënimit.
Përfitojnë gjithashtu dhe disa të dënuar të mitur. Ndërsa disa të tjerë përfitojnë me ulje dënimi 1/3.
Një tjetër kategori përfituese janë dhe burrat mbi 60 vjeç, që nuk janë dënuar për vepra penale që ndalohen nga amnistia”,- tha Gjonaj.
Nuk dihet se sa është numri për përfituesit e tjerë të të gjitha kategorive. Po ashtu nuk bëhet me dije koha kur do të nis zbatimi i kësaj amnistie.
Por në lidhje me mekanizmin që është ndjekur amnistive të tjera pritet që falja të nis që ditën që bëhet edhe publikimi. Pra i bie ditën e sotme dhe nesër./Fjala.al/
