Mesfushori i Kombëtares së Kosovës, Valon Berisha po përgatitet që të largohet nga klubi i Lazios gjatë merkatos së janarit.
Ishte lojtari Riza Durmishi ai i cili u largua i pari nga bardhekaltrit, por siç duket tashmë një tjetër shqiptar po kërkon që të lëvizë.
Shkak i këtyre largimeve dhe pakënaqësive të lojtarëve me origjinë shqiptare është bërë trajneri Simone Inzaghi, i cili nuk i ka aktivizuar mjaftueshëm dhe nuk u ka dhënë aspak hapësirë kohore.
Ndërkohë drejtori i klubit, shqiptari Igli Tare është duke menduar për të gjetur një tjetër ekip të mirë për kalimin e lojtarit të Kombëtares së Kosovës.
26-vjeçari i cili kaloi nga Salzburgu te Lazio gjatë verës së vitit 2018, me një shifër prej 8 milionë euro, pranon si mundësi largimi edhe huazimin nëse nuk bëhet e mundur një shitje e menjëhershme. Ndërkohë ai dëshiron që të jetë në formë sa më të mirë për fazën “Play off” të Ligës së Kombeve, fitorja e së cilës do e çonte përfaqësuesen kosovare në fazën e eliminimit direkt./Përgatiti: Fjala.al/
