Një aksident i rëndë u regjistrua mbrëmjen e sotme në Shkodër, ku një fëmijë i moshës 5 vjeç u gjet i plagosur mbi asfalt. Fëmija ka rënë në rrugë nga xhami i pasëm i makinës së babai të tij. Prindi nuk e ka parë fëmijën që ka rënë dhe ka vijuar udhëtimin.
Ndërkohë ka qenë një makinë e rastit që ka pikasur fëmijën dhe e ka transportuar në spital. Pak minuta më vonë është paraqitur dhe babai i vogëlushit, i cili i’u ka thënë mjekëve se fëmija ka hapur dritaren dhe ka rënë poshtë, aksident të cilin ai se ka vërejtur.
Fëmija është duke marrë trajtimin e duhur pranë Spitalit Rajonal Shkodër, ndërsa ndodhet në gjendje të rëndë për jetën. Mjeku i Urgjencës, Astrit Lahi, tregoi detaje nga gjendja e të miturit. Lahi tha se 5-vjeçari ka marrë plagë kryesisht në pjesën e pasme të kokës, ndërsa gjendja e tij paraqitet e rëndë.
“Gjendja e fëmijës është e rëndë, si pasojë e një traume të pësuar. Djali ka ardhur në urgjencë pa koshiencë. Është gjetur nga një qytetar në rrugë, pa një identitet. Ishte paraqitur me një plagë pas koke dhe me probleme në frymëmarrje dhe koshiencë të kompromentuar. I’u dha ndihma e shpejtë. Gjendja e tij pësoi një farë përmirësimi, por do të shohim se si do të shkojë. Aktualisht gjendja e fëmijës është në prognozë të rezervuar dhe ai është shtruar në reanimacion. Është herët të flasim, pasi paraqet shenjat e një konvolcioni cerebral, dhe duhet të kalojnë disa orë” – u shpreh mjeku, Astrit Lahi./Fjala.al
