Profesoresha e njohur e inxhinierisë, Luljeta Bozo, si dhe specialiste në fushën e inxhinierisë së ndërtimit, është një nga emrat më të vlerësuar akademikë në Shqipëri. Për 45 vite ajo ka dhënë mësim në fakultetin e Inxhinierisë së Ndërtimit, duke nxjerrë breza të tërë inxhinierësh.
Luljeta ishte gruaja gojë ëmbël që qetësoi dhe mësoi të gjithë shqiptarët, pas situatës së rëndë që kaluam nga tërmeti i 26 nëntorit.
Profesoresha në daljet e saj publike ku ka folur për sigurinë e ndërtimeve të reja në qytetin e Tiranës, ka treguar edhe një detaj se si në gjithë këtë fluks ndërtimi, ato janë bërë pa një plan urbanistikë.
Fama dhe emri i mirë, e bënë këtë grua fisnike që të ishte edhe në krah të Shtabit të Emergjencave dhe Rindërtimit pas tërmetit, ku me përvojën e saj shumëvjeçare, ajo u dha leksione edhe ekspertëve më të mirë të qeverisë.
Tashmë e kthyer në një traditë, përzgjedhja e personazhit të vitit nga çdo media, emisioni ‘Opinion’ zgjodhi pikërisht Prof. Luljeta Bozon, për dy arsye: sepse në këto ditë tronditëse të tërmetit ishte e para që i dha kurajo qytetarëve dhe u mësoi se, si duhet të përballojmë situata të tilla katastrofash natyrore.
E dyta: sepse mbas një periudhe shumë të gjatë, ajo arriti të tregojë që dija, kultura dhe arsimimi, mbeten gjithmonë thesarë të çmuar dhe të pazëvendësueshëm./Fjala.al/
