Agjencia e Trajtimit të Pronave përfundon procesin e shqyrtimit administrativ të aplikimeve për kompensim financiar me kërkesë të veçantë, të paraqitura nga subjektet e interesuar, të cilët disponojnë vendime përfundimtare që u kanë njohur të drejtën e kompensimit të pronës.
“Aktualisht ka përfunduar shqyrtimi administrativ i 16 aplikimeve për kompensim financiar me kërkesë të veçantë, për të cilat ATP ka miratuar me vendim pranimin e këtyre kërkesave/aplikimeve, pasi kanë rezultuar të jenë në përputhje të plotë me kriteret e përcaktuara.
Fondi financiar, i vënë në dispozicion nga Buxheti i Shtetit, që ATP do të shpërndajë në total për subjektet përfitues të 16 aplikimeve sipas kërkesave të tyre, është në vlerën 227 milionë e 640 mijë lekë, nga të cilat 47 milionë e 12 mijë lekë do të lëvrohen menjëherë si këst i parë, ndërsa pjesa tjetër do të lëvrohet me këste çdo fillim viti buxhetor, bazuar në mënyrën e përfitimit të kompensimit për të cilën ka aplikuar subjekti” njofton ATP”-thuhet në njoftimin e ATP-së.
Agjencia e Trajtimit të Pronave bën me dije se nga përfundimi i trajtimit të këtyre 16 aplikimeve për kompensim financiar me kërkesë të veçantë, Buxhetit të Shtetit i kursehet në total një fond në vlerën 347 milionë lekë.
Procesi i kompensimit të pronave parashikon një procedurë të veçantë kompensimi për ata që duan të përfitojnë më shpejt. Referuar ligjit, për të përshpejtuar procesin e kompensimit duhet të heqësh dorë nga një pjesë e fondit.
Agjencia e Trajtimit të Pronave njofton subjektet e interesuara se kësti përkatës për secilin përfitues do të jenë disponibël në llogaritë e tyre në bankat e nivelit të dytë pas përfundimit të procedurave të transfertave bankare në ditët në vazhdim.
