Ish-kryeministri, Sali Berisha, u gjobit ditën e sotme me 500 mijë lekë për denoncimet që publikon në rrjetin social “Facebook”. Gjykata Civile e Tiranës, pranoi padinë e kryeministrit Edi Rama ndaj ish-Kryeministrit, Sali Berisha, i cili përveç gjobës duhet të fshijë nga rrjetet sociale postimin, i cili është cilësuar si shpifje, nga vendimi i Gjykatës.
Pas dënimit me gjobë të Berishës, ka reaguar menjëherë Zyra e Shtypit e ish-kryeministrit. Sipas kësaj të fundit, përbën një rast të paprecedent pasi është kufizim flagrant i të drejtës dhe lirisë së shprehjes. Si dhe bie në kundërshtim të hapur me jurisprudencën e Gjykatës së Lartë dhe mbi të gjitha, me praktikën e Gjykatës Europiane për të Drejtat e Njeriut, të cilat, po sipas kësaj zyre, janë të shantazhuara nga vettingu.
Ja reagimi i plotë i Zyrës së Shtypit të ish-kryeministrit Sali Berisha:
“Në vazhdën e fushatës se kufizimit të fjalës së lirë dhe informacionit në Shqipëri, kryetari i narkoshtetit Edi Rama, duke keqpërdorur gjykatat e shantazhuara nga vettingu dhe të etiketuara si KÇK, sot nëpërmjet gjykatës së Tiranës vendosi pranimin e pjesshëm të padisë së tij, për cenim nderi dhe dinjiteti (kërkohej 1 mln lekë).
Objekt i shqyrtimit ishte një postim ne FB e zotit Berisha, në të cilin ilustrohej dhe bëhej një koment politik mbi një artikull të publikuar më parë nga media të pavarura.
Qartësisht në postim ngrihej një argument politik dhe ilustroheshin arsyet e ngecjes së procesit të integrimit europian të vendit, për shkak të keqqeverisjes, si dhe bëhej thirrje të lexohej i plotë artikulli i cili përbënte burimin e lajmit.
U provua në gjykim se artikulli burim i lajmit as ishte përgënjeshtruar ndonjëherë ose të jetë shpallur i pavërtetë dhe as Rama nuk ka ndërmarrë deri më sot asnjë aksion civil ose penal ndaj prodhuesve të lajmit, por vetëm ndaj zotit Berisha të evidentuar qartazi si kundërshtar politik.
Pra padia është në mënyrë të qartë politikisht e motivuar. Pranimi i padisë për shkaktim dëmi moral në këtë rast, përbën një rast të paprecedent pasi është kufizim flagrant i të drejtës dhe lirisë së shprehjes, si dhe bie në kundërshtim të hapur me jurisprudencën e Gjykatës së Lartë dhe mbi të gjitha me praktikën e Gjykatës Europiane për të Drejtat e Njeriut”./Fjala.al/
