Për kompaninë koncesionare të sterilizimit, pagesat e buxhetit në 9 muajt e parë të këtij viti kanë tejkaluar shumën që u pagua për të gjithë vitin e kaluar, raporton Top Channel.
Sipas një raporti zyrtar të ministrisë së financave, thuhet se kostot e koncesionit të sterilizimit nuk ndalen duke u rritur me ritme shpërthyese nga viti në vit.
Sipas të dhënave të raportit, për gjithë vitin 2018 Ministria e Shëndetësisë pagoi 1 miliardë e 625 milionë lekë ose 13.3 milionë euro për kompaninë koncesionare. Por vetëm në 9 muajt e parë të këtij viti, pagesa ka arritur në 13.4 milionë euro, pra më shumë se sa gjithë viti i kaluar.
Sipas raportit, për të gjithë vitin 2019 pagesat e buxhetit për koncesionin e sterilizimit pritet të arrijnë në 15.7 milionë euro ose 18 % më shumë se sa një vit më parë.
Ministria e Shëndetësisë e justifikon rritjen e kostove që buxheti paguan për sterilizimin me faktin se numri i ndërhyrjeve kirurgjikale në spitalet e vendit kanë qenë më i lartë nga sa është parashikuar në kontratën koncesionare.
Në marrëveshjen e koncesionit është caktuar si tavan numri 63 mijë operacione në vit. Por vitin e kaluar në spitalet publike u kryen mbi 112 mijë operacione dhe për çdo tejkalim qeveria paguan lekë shtesë për privatin.
Koncesioni i sterilizimit ka hyrë në fuqi në 10 dhjetor të vitit 2015.
