Në mbledhjen e Komitetit të Rindërtimit, ministrja Elva Margariti, bëri të ditur se shtëpitë e reja që do të ndërtohen pas tërmetit do të bëhen me parafabrikate.
“Tipologjitë e banesave, mendojmë se do të jetë një tipologji për ta kthyer në modele ligjore. Përveç aspekteve të strehimit kemi dalë me tre modele 1+1, 2+1 dhe 3+1. Teknologjia e parafabrikateve është e duhura dhe jep rezultate të shpejta dhe që i përgjigjet nevojës sizmike. Këto janë studime paraprake dhe këto do të jenë topologjitë për qendërzim rural dhe do të jenë të uniformuara” tha ministrja.
Ndërsa sekretari i Komitetit të Rindërtimit, Ilir Hoxholli, u shpreh se bashkë me ministren kanë negociuar për uljen e çmimit dhe përfshirjen e transportit nga do të sillen. Ai theksoi se cilësia do të jetë e njëjtë sikur përdoret në SHBA dhe BE.
Mbi 10 mijë banorë në zonat rurale që janë prekur nga tërmeti do të kalojnë natën e ndërrimit të viteve në çadër, ndërkohë që 3613 janë të sistemuar në hotele. Kryeministri Edi Rama, deklaroi në mbledhjen e tretë të Komitetit të Rindërtimit se brenda janarit duhet të nisë puna për ndërtimin e banesave në zonat rurale.
Objektivi i qeverisë është që brenda vitit 2020 të gjitha ata që jetojnë në fshat dhe u është shembur banesa, të kenë shtëpitë e reja, ndërsa deri në fund të vitit 2021 të ketë filluar akomodimi i banorëve që sot janë me qira në zonat urbane.
