Pas festave të fundvitit, emigrantët që jetojnë në Itali kanë zgjedhur për tu larguar portin e Vlorës dhe atë të Durrësit, ku është parë një fluks i madh i udhëtarëve.
Porti i Vlorës bëri të ditur sot se rreth 2000 pasagjerë shqiptarë dhe të huaj kanë udhëtuar ditën e sotme drejt portit të Brindisit.
Ndërkohë në portin e Durrësit janë dyfishuar lundrimet. Autoriteti Portual bëjnë me dije janë dyfishuar dhe sportelet e përpunimit për pasagjerët dhe mjetet e tyre.
“Përgjatë ditës së sotme dhe nesërme,(04-05.01.2020), tragetet do të dyfishojnë lundrimet e tyre me portet e Italisë, me qëllim përballimin e fluksit të udhëtarëve, kryesisht në dalje. 3 tragete kanë mbërritur mëngjesin e sotëm në Portin e Durrësit, 2 prej të cilëve kanë rinisur lundrimin drejt Portit të Barit, pak para mesditës. “Rigel II” dhe “AF Francesca” pritet të mbërrijnë në Durrës mbrëmjen e sotme, për të udhëtuar sërish rreth mesnatës drejt Portit të Barit. Me qëllim përballimin me sukses të fluksit të hyrje/daljeve janë dyfishuar dhe sportelet e përpunimit për pasagjerët dhe mjetet e tyre”, njofton Autoriteti Portual i Durrësit.
Pas festave të fundvitit në të gjitha pikat e kalimit kufitar ka një fluks të shtuar të emigrantëve që largohen nga vendi. Policia Kufitare po ndërmerr një sërë masash për eliminimin e radhëve në pikat kufitare, si dhe për parandalimin e ngjarjeve dhe paligjshmërisë. /Fjala.al
