Shtetet e Bashkuara vranë komandantin e lartë Iranian, Qasem Soleimani, me anë të një sulmi ajror, i cili u konfirmua edhe nga Pentagoni se ai u vra me “vendim të Presidentit”.
Gjenerali Qasem Soleimani, 62-vjeç, është konsideruar figura e dytë më e fuqishme në Iran, i cilësuar si figurë historike kombëtare, pas liderit suprem, Ayatollah Ali Khamenei.
Mirëpo Shtetet e Bashkuara e kanë parë si kërcënim komandantin dhe forcat e tij duke i bërë përgjegjëse për vdekjet e qindra personave që kanë qenë pjesë e personelit amerikan.
Gjenerali Soleimani ka qenë në makinë teksa ishte nisur për në aeroportin e Bagdadit, kur është sulmuar.
Menjëherë pas sulmit nisën protesta të dhunshme para Ambasadës Amerikane në Bagdad.
Zëdhënësi i Sekretarit të Përgjithshëm të Kombeve të Bashkuara në një deklaratë në lidhje me gjendjen e tensionuar u shpreh se është thellësisht i shqetësuar nga rritja e tensioneve me Lindjen e Mesme.
“Ky është një moment në të cilin udhëheqësit duhet të ushtrojnë përmbajtje maksimale. Bota nuk mund të përballojë një luftë tjetër në rajon”, deklaroi zëdhënësi./Fjala.al
