Era e fortë që pushtoi vendin pasditen e djeshme ka sjellë dëme të mëdha. Edhe pse autoritetet përgjegjëse dhe kompetente janë kursyer në dalje publike për këshilla dhe detaje, mësohet se dëmet janë të mëdha dhe kërcënuese.
Përveç rrëzimit të pemëve dhe objekteve të pavendosura mirë, një rrezik serioz e kërcënues për jetën e banorëve, kryesisht në Tiranë janë edhe depozitat e ujit. Por deri orëve të para të mëngjesit, për fat, nuk është lajmëruar për ndonjë të lënduar.
Selita, Kruja dhe Mamurrasi kanë patur dhe kanë probleme me energjinë Elektrike. Në Tiranë ka pësuar djegie kabina elektrike, ndërsa në Krujë pemët kanë këputur telat përcjellës. Po ashtu edhe në Mamurras.
Janë raportuar dëme materiale nëpër lokale dhe ndërtesa që kanë patur tenda, por pa rrezikuar jetën e njerëzve.
Sipas të dhënave për gjatë gjithë natës në zonat problematike, punëtorët kanë qëndruar në rrugët problematike për të mos lejuar bllokimin. Ndërkohë bëhet me dije se deti sërish është kërcënues.
Asnjë anije nuk lejohet të dalë as sot në det. Era e fortë mësohet se do t`i kalojë 8 ballë. Po ashtu iu është kërkuar edhe peshkarexhave e njëjta gjë. Duhet të evitojnë daljen sot dhe deri nesër pas dreke.
Të dhënat në lidhje me energjinë elektrike i ka dhënë OSHEE që pak pas mesnate. Sipas tyre bëhet me dije se si pasojë e erërave të forta, edhe dy kabina kanë mbetur pa energji elektrike në zonën e Selitës në Tiranë.
OSHEE thekson se degët e thyera kanë rënë mbi linjën e tensionit të mesëm e cila është pjesë e fiderit nr. 25 në Selitë. Ndërkohë po punohet për rregullimin sa më shpejt të situatës.
Më problematike situata paraqitet pikërisht në Selitë ku një fider u këput totalisht për shkak të rrëzimit të pemëve dhe një shtylle tensioni.
Po ashtu edhe zona e Fushë- Krujës mbeti pa energji elektrike prej problemeve me motin e pazakontë që kapi dje Shqipërinë. /Fjala.al/
