Regjisori i njohur Dhimitër Orgocka ka rrëfyer karrierën në teatër dhe film. Ai ka qenë i ftuar në programin “Rudina” me rastin e 83-vjetorit të lindjes, të cilin e ka festuar pak javë më parë, ku është surprizuar edhe nga miqtë e tij edhe kolegët.
Në studio, Orgocka ka folur për karrierën e gjatë në skenën shqiptare. Ai vazhdon të jetë aktiv me shfaqje teatrale, herë si regjisor dhe në raste të tjera si aktor.
Ndër vite, ai ka vënë në skenë mbi 104 premiera në teatrin e Korçës, Fierit, Elbasanit, Prishtinës, Shkupit. Ndërsa si aktor, ai numëron më shumë se 82 role në shfaqje teatrale dhe shumë të tjerë në filma. Por në studio, Orgocka tregon se ka kërcyer në rininë e tij edhe balet me grupet e atëhershme.
“Unë kur kam qenë i ri kam recituar, e kam dashur poezinë shumë, jam marrë me recitimet. Pse jo kërceja dhe në balet. Salla ishte pranë pallatit të Kulturës dhe Klubi “Naim Frashëri” në Korçë.”, u shpreh regjisori Dhimitër Orgocka.
