Zyrtarët e lartë amerikanë nuk pranojnë të japin prova lidhur me pretendimet se gjeneral Sulejmani do të sulmonte 4 ambasadat e SHBA-ve në Lindjen e Mesme.
Dy javë pasi presidenti Donald Trump bëri të ditur se Shtetet e Bashkuara të Amerikës kishin vrarë gjeneralin iranian, Kasem Sulejmani, dy nga zyrtarët më të lartë të Sigurisë Kombëtare të Presidentit po refuzojnë të japin prova konkrete.
Sekretari i Mbrojtjes Mark Esper dhe këshilltari i Sigurisë Kombëtare Robert O’Brien nuk iu referuan informacioneve të inteligjencës amerikane kur u pyetën nga gazetarët.
Në një intervistë Donald Trump tha të premten se ishte ai që miratoi sulmin ushtarak të 3 janarit, ku mbeti i vrarë Kasem Sulejmani sepse ai besonte se gjenerali iranian po synonte të godiste ambasadat amerikane.
“Presidenti nuk tha në asnjë moment se kishte informacion nga inteligjenca amerikane se 4 ambasadat do të sulmoheshin”, tha për CNN Sekretari amerikan i Mbrojtjes, Mark Esper.
Megjithatë, Esper ndan të njëjtin besim si presidenti se ambasadat kërcënoheshin vërtet nga Sulejmani.
“Ajo që tha Presidenti në lidhje me sulmin e mundshëm ndaj ambasadave është edhe ajo që unë e besoj. Presidenti besonte se ambasadat ishin në shënjestrën e Sulejmanit”, tha Esper.
Kasem Sulejmani u vra nga një avion amerikan i telekomanduar më 3 janar të këtij viti duke e futur botën në një situatë të tensionuar.
Irani premtoi se do të kundërpërgjigjej ashpër, por sulmet e tij ishin vetëm disa raketa në dy baza amerikane, të cilat ushtarët amerikanë i kishin braktisur disa orë para sulmit.
Tani që tensionet janë zbehur disi, SHBA nuk pranon të japë prova se Kasem Sulejmani do të sulmonte 4 ambasada amerikane në Lindjen e Mesme.
Arsyeja e vrasjes së tij mbetet deri tani thjesht çështje besimi dhe jo provash konkrete./Fjala.al/
