Në bazat ajrore amerikane të vendosura në Al Asad të Irakut që u goditën nga raketat iraniane duken pasojat shkatërrimtare të sulmit.
Gjiganti britanik, BBC ka arritur të sjellë pamje nga brenda kësaj baze me siguri të lartë.
Në të tregohen dëmet e shkaktuara nga sulmet e Iranit, ndërsa korrespondenti i BBC ka folur edhe me ushtarët që i mbijetuan sulmit.
Ushtarët rrëfejnë se si kanë mbijetuar sulmit pasi u fshehën në bunker.
Bëhet fjalë për ushtarakun Akeem Ferguson, i cili ishte në një bunker kur ekipi i tij mori lajmin drithërues: Gjashtë raketa balistike iraniane u drejtuan në drejtimin e tyre.
“Mbaja armën time dhe e vura kokën poshtë dhe u përpoqa të gjej një vend të përshtatshëm, kështu që fillova t’u këndoja vajzave të mia – brenda kokës time”, kishte thënë rreshteri Ferguson. “Dhe unë vetëm prisja”.
“Unë isha 100% i gatshëm për të vdekur”, ka shtuar ai.
Sulmi me raketa ishte një formë hakmarrjeje e Iranit pas vrasjes nga SHBA të gjeneral Kasem Sulejmanit.
