Lirimi i ish-numrit dy të bandës së Durrësit, Endrit Dokle ka ngritur alarmin në opinion publik pas vendimit skandaloz të gjyqtares Enkeleida Hoxha.
Ky rast nuk është anashkaluar as nga kryeministri Edi Rama, i cili sulmoi gjyqtaren Hoxha duke e përfshirë edhe atë në listën e grupit KÇK.
Duke folur në konferencën e përbashkët me komisionarin për Zgjerimin e BE-së Olivér Várhelyi, kreu i qeverisë shpjegoi se në ditët në vijim do të nisë aksionin e saj iniciativa ‘Anti-KÇK”. Për këtë ai informoi edhe vetë komisionerin për zgjerimin.
“E kam informuar komisionerin se në ditët në vijim do ndërmarrim një nisme të re për të hapur një ofensivë shembullore kundër krimit të organizuar dhe atyre gjykatësve e prokurorëve që si në rastin e para dy ditësh i përkasin organizatës KCK dhe po e përdorin autoritetin e tyre në këtë fazë të ndërmjetme për të bashkëpunuar hapur dhe paturpësisht me krimin”, tha Rama.
Endrit Dokle, i dënuar me burgim të përjetshëm për një sërë krimesh, përfshirë vrasje dhe pjesëmarrje në organizatë kriminale pritet të lirohet nga burgu me kusht.
Gjyqtarja e Gjykatës së Shkallës së Parë në Krujë, Enkeleida Hoxha, vendosi lirimin nga qelitë të tij pas disa vendimeve të mëparshme që i kishin krijuar lehtësira Dokles./Fjala.al/
